Санаи 12 июли соли ҷорӣ дар толори маҷлисгузаронии Кумитаи давлатии идораи замин ва геодезии Ҷумҳурии Тоҷикистон бо иштироки роҳбарияти Кумитаи ҳифзи муҳити зисти назди Ҳукумати Ҷумҳурии Тоҷикистон, сардорони раёсатҳо, шуъбаву бахшҳои ҳифзи муҳити зисти вилоятҳо, шаҳру ноҳияҳо ва дигар сохтору зермуассисаҳои Кумита ҷаласаи мушовара оид ба натиҷагирӣ аз фаъолияти Кумита дар 6 моҳи соли 2021 баргузор гардид.

Ҳисоботро оид ба натиҷаҳои фаъолияти 6 моҳа муовини Раиси Кумита Мавлодод Абдуқодирхон қироат намуд, ки зимни он аз қонеъкунанда набудани фаъолияти як қатор шуъбаву бахшҳои ҳифзи муҳити зисти шаҳру ноҳияҳо ишора карда шуд. Сипас сардорони Раёсатҳои ҳифзи муҳити зисти вилоятҳои ВМКБ, Суғд, Хатлон, бозрасии минтақаи Кӯлоб ва шаҳри Душанбе доир ба фаъолияти шашмоҳа ҳисобот доданд.   

Раиси Кумита Шерализода Б.А. аз қаноатбахш набудани фаъолияти шуъбаву бахшҳои ҳифзи муҳити зисти баъзе шаҳру ноҳияҳо изҳори нигаронӣ намуда, ин омилро ба бемасъулиятии роҳбарони шуъбаву бахшҳо нисбат дод.  

Дар ҷаласаи мушовара муовини сардори раёсати кишоварзӣ ва ҳифзи муҳити зисти Дастгоҳи иҷроияи Президенти Ҷумҳурии Тоҷикистон Холзода Каромиддин иштирок ва суханронӣ намуд.

Пас аз суханрониву музокираҳо бо назардошти пешниҳодҳои муовини сардори раёсат оид ба масъалаҳои кишоварзӣ ва экологияи Дастгоҳи Президенти Ҷумҳурии Тоҷикистон қарори ҳайати мушовара қабул гардид.