Мизи мудаввар дар мавзуи “Татбиқи технологияҳои сабз дар савдои чакана: масъулияти иҷтимоӣ ва рушди устувор”                 

                                          

Мавзуи иқтисоди сабз дар чанд соли охир ба яке мавзуъҳои муҳими рӯз табдил ёфтааст. 26 феврали соли 2025 дар меҳмонхонаи “Серена”-и ш.Душанбе дар ҳамкорӣ бо Маркази Орхуси Кумитаи ҳифзи муҳити зисти назди Ҳукумати Ҷумҳурии Тоҷикистон ва Институти илмию тадқиқотии рушди устувор ва иқтисоди сабзи Донишгоҳи байналмилалии сайёҳӣ ва соҳибкории Тоҷикистон бо иштироки олимону коршиносон, намояндагони сохторҳои давлативу байналмилалӣ, роҳбарону масъулони ширкатҳои тиҷоратӣ ва марказҳои бузурги савдои пойтахт ва намояндагони иттиҳодияҳои ҷамъиятӣ мизи мудаввар дар мавзуи “Татбиқи технологияҳои сабз дар савдои чакана: масъулияти иҷтимоӣ ва рушди устувор” баргузор гардид.

Иштирокчиёни чорабинӣ аз ташаббусҳои ҷаҳонии Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон доир ба рушди устувор, иқтисоди сабз, ҳифзи муҳити зист ва тағйирёбии иқлим ёдовар шуданд. Аз ҷумла дар суханронии директори Институти рушди устувор ва иқтисоди сабз қайд карда шуд, ки рушди соҳаи тиҷорат, ки дар шароити ташаккули иқтисоди сабз аҳаммияти махсуси иҷтимоӣ дорад, ҳамчун яке аз самтҳои муҳим бояд мавриди таваҷҷуҳи хоса қарор гирад. Намояндагони Кумитаи ҳифзи муҳити зист ва вазорати рушди иқтисод ва савдои Ҷумҳурии Тоҷикистон низ доир ба тадбирҳои амалишаванда дар доираи Стратегияи рушди иқтисоди сабз барои солҳои 2023-2027 ибрози андеша намуданд.

Дар рӯнамои сардори Маркази Орхуси Кумита чорабиниҳои назариявию амалии Марказҳои Орхуси Тоҷикистон дар самти рушди иқтисоди сабз пешкаши иштирокчиён гардонда шуд.

Дар қисмати дигари чорабинӣ роҳбарону мутахассисони шабакаҳои савдои “Пайкар”, “Лаклак” ва кооперативи тиҷоратии “Ҳакимӣ” ба ҳозирин доир ба чорабиниҳои анҷомдода нисбати рушди иқтисоди сабз маълумот доданд.

Дар хотима баҳсу музокираҳо оид ба мавзуъҳои матраҳшуда сурат гирифт. Пас аз шунидани музокираҳо таклифу пешниҳодҳо дар шакли хулоса қабул гардиданд.