Ҷашни Сада ва намоиши дастовардҳои Кумитаи ҳифзи муҳити зист               

                                          

1 феврали соли 2025 дар Боғи фарҳангу фароғатии ба номи Абулқосим Фирдавсии шаҳри Душанбе ҷашни Сада таҷлил гардид, ки дар он ниҳолу тухмии зироатҳои кишоварзӣ ба намоиш ва фурӯш гузошта шуд. Дар чорабинии мазкур баробари вазорату идораҳо, ташкилоту муассисаҳо дастовардҳои Кумитаи ҳифзи муҳити зисти назди Ҳукумати Ҷумҳурии Тоҷикистон, дар мисоли шиору овезаҳои тарғиботӣ оид ба ташаббусҳои Ҳукумати Ҷумҳурии Тоҷикистон вобаста ба обу иқлим, расму мусаввараҳои табиати нотакрори кӯҳсори Ватан, аз ҷумла обу дарёҳо, пиряху ҳайвоноти нодири он ва дигар дастовардҳои соҳавӣ низ ба маърази тамошо гузошта шуд.

Намояндагони Ҳукумати Ҷумҳурии Тоҷикистон таҳти роҳбарии муовини Сарвазири Ҷумҳурии Тоҷикистон Зиёзода Сулаймон Ризоӣ бо дастовардҳои пешниҳодшуда шинос шуда, ба муҳтавои намоишгоҳ баҳои баланд доданд.

Сада яке аз ҷашнҳои мавсимию маросимии мардуми ориёитабор, аз ҷумла ниёгони тоҷикон буда, чун рамзи омодагӣ ба кишту кори баҳорӣ ва муждаи Наврӯз пазироӣ мегардид. Дар гузашта ва имрӯз мардум онро бо афрӯхтани гулханҳои бузург таҷлил менамуданд. Чун оташ дар фарҳанги мардуми ориёӣ рамзи покӣ, рӯшноӣ ва гармӣ буда, сарчашмаи рӯзгори босубот ва зиндагии шоиста маҳсуб меёфт.

Намоишгоҳи дастовардҳои кишоварзон, маҳсулоти аз ҷиҳати экологӣ тозаи ватанӣ, ҳамчунин ҳунарнамоии санъаткорон, оташафрӯзиҳо ва дигар ба маъраз гузоштани ҳунарҳои мардумии минтақаҳои гуногуни кишвар, ки рамзи хоси ҷашни ниёгонамон Сада мебошанд, таваҷҷуҳи сокинону меҳмонон, аз ҷумла сайёҳонро ба худ ҷалб намуданд.