Баррасии “Нақши мамнуъгоҳу паркҳои табиии Тоҷикистон дар баланд бардоштани сатҳи маърифати экологӣ ва кишваршиносии хонандагони мактабҳо” дар семинар-машварати ҷумҳуриявӣ               

                                          

Санаи 11 уми декабри соли 2024 дар Маркази ҷумҳуриявии муассисаҳои таҳсилоти иловагии Вазорати маориф ва илми Ҷумҳурии Тоҷикистон дар доираи амалишавии "Экспедитсияи XVIII ҷумҳуриявии сайёҳӣ-кишваршиносии хонандагон таҳти унвони "Тоҷикистон-кишвари азизи ман" барои солҳои 2020-2025" бо иштироки намояндагони Вазорати маориф ва илм, Кумитаи ҳифзи муҳити зист ва Кумитаи сайёҳии назди Ҳукумати Ҷумҳурии Тоҷикистон, инчунин масъулону  роҳбарони маҳфилҳои экология ва кишваршиносии минтақаҳои ҷумҳурӣ семинар-машварат баргузор гардид. 

Дар ҷараёни семинар сардабири нашрияи "Инсон ва табиат" ва масъули Маркази Орхуси Кумитаи ҳифзи муҳити зисти назди Ҳукумати Ҷумҳурии Тоҷикистон Яқубов Ҷамолиддин дар мавзуи «Нақши мамнуъгоҳу паркҳои табиии Тоҷикистон дар баланд бардоштани сатҳи маърифати экологӣ ва кишваршиносии хонандагон», мудири бахши котибот, матбуот ва маркетинги Кумитаи сайёҳии назди Ҳукумати Ҷумҳурии Тоҷикистон Сафаров Давлатҷон дар мавзуи «Имкониятҳои сайёҳии Тоҷикистон» бо рӯнамо баромад намуданд.

Тазаккур дода шуд, ки мамнуъгоҳу паркҳои табиии давлатии Тоҷикистон барои мукаммал ва васеъ гардонидани савияи донишу ҷаҳонбинии хонандагон, азбар кардани малакаи меҳнатӣ, ҷалб кунондан ба корҳои фоиданоки ҷамъиятӣ, ҷисман солим будани онҳо мусоидат  менамояд.

Мувофиқи банди 57-и “Барномаи давлатии маҷмуи рушди тарбия ва маърифати экологии аҳолии Ҷумҳурии Тоҷикистон барои солҳои 2021 – 2025” ташкил кардани хатсайрҳо ба мамнуъгоҳу паркҳои давлатии табиӣ яке аз чорабиниҳо дар баланд бардоштани сатҳи маърифати экологии хонандагон буда метавонад.

Маркази ҷумҳуриявии муассисаҳои таҳсилоти иловагии Вазорати маориф ва илми Ҷумҳурии Тоҷикистон тасмим дорад дар якҷоягӣ бо Муассисаи давлатии Ҳудудҳои табиии махсус муҳофизатшавандаи Кумитаи ҳифзи муҳити зисти назди Ҳукумати Ҷумҳурии Тоҷикистон ва Кумитаи сайёҳии назди Ҳукумати Ҷумҳурии Тоҷикистон дар соли 2025 бо мақсади баланд бардоштани сатҳи фарҳангу маърифати экологии хонандагони мактабҳо ба мамнуъгоҳу паркҳои давлатии табиӣ эксурсияҳоро ташкил намоянд.