5 декабр – Рӯзи байналмилалии ҳифзи хок                 

                                          

ВОХӮРИИ ИТТИЛООТӢ ДАР МАВЗУИ “МО ҒАМХОРИ ХОК ҲАСТЕМ”

3 декабри соли равон бо ташаббуси Маркази Орхус дар толори конфронсгузаронии Кумитаи ҳифзи муҳити зисти назди Хукумати Ҷумхурии Тоҷикистон  бахшида ба Рӯзи байналмилалии хок ва Рӯзи волонтёрон бо иштироки мутахассисони Кумита ва аъзои маҳфили эковолонтёрони Кумита вохӯрии иттилоотӣ баргузор гардид.  Дар чорабинӣ ба ҳозирин намояндаи Институти хокшиносӣ ва агрохимияи Академияи миллии илмҳои Тоҷикистон, номзади илмҳои хокшиносӣ Муродҷон Эршашев дар мавзуи “Чаро хок ба ғамхорӣ ниёз дорад?” тариқи рӯнамо доир ба намудҳои хок, сабабҳои таназзулёбии хок, чораҳои беҳсозии таркиби хок баромад намуд. Сипас, иштирокчиён маърӯзаи мутахассиси таҳияи дастурамалҳо ва тавсияҳо дар соҳаи ҳифзи муҳити зисти Кумита Сиёвуш Давлатов доир ба моҳияти баргузории  ҷашни хок ҳамчун санаи байналмилалӣ шуниданд.  

Дар қисмати дуюми вохӯрии иттилоотӣ тибқи нақшаи барномаи чорабинӣ сардори КВД ИИ «Табиат» Каримов А. дар мавзуи Саҳми  Кумитаи ҳифзи муҳити зист дар амалигардонии сиёсати экологии Ҳукумати Ҷумҳурии Тоҷикистон, сармуҳаррири нашрияи “Инсон ва табиат” ва масъули Маркази Орхуси Кумита Яқубов Ҷ. дар мавзуи “Принсипҳои Конвенсияи Орхус ва рафти амалишавии принсипҳои Конвенсияи Орхус дар Ҷумҳурии Тоҷикистон”, аъзои маҳфили эковолонтёрони Кумита Абдумалик Наврузов дар мавзуи “Нақши ҳайвонот дар ҳаёти инсоният” маърӯзаҳояшонро ироа намуданд. Ҳамзамон, аъзои маҳфили эковолонтёрони Кумита ба фаъолияти маҳфил дар соли 2024: мушкилот ва дурнамо барои соли 2025 андешаҳояшонро баён доштанд.

Қайд карда шуд, ки дар интиҳои сол аъзои маҳфили эковолонтёрон оир ба фаъолияташон дар соли 2024 ва нақшаи фаъолият барои соли 2025 маълумотро  ба  Кумита пешниҳод мекунанд.