Мусоҳиба дар шабакаи телевизионии CBC вобаста ба аҳаммияти иқдоми Пешвои миллат оид ба ҳифзи пиряхҳо             

                                          

Дар мусоҳибаи имрӯза бо шабакаи телевизионии Си-Би-Си, шарики воситаҳои ахбори оммаи COP29 дар Боку, раиси Кумитаи ҳифзи муҳити зисти назди Ҳукумати Ҷумҳурии Тоҷикистон Шерализода Баҳодур аҳамияти ташаббуси Президенти Ҷумҳурии Тоҷикистон муҳтарам Эмомалӣ Раҳмон оид ба ҳифзи муҳити зистро шарҳ дода, мавриди таваҷҷуҳи алоқамандонаи шабакаҳои хабарии бурунмарзӣ қарор гирифт. Аз ҷумла таъкид карда шуд, ки ин иқдом аз ҷониби Маҷмаи Умумии Созмони Милали Муттаҳид пуштибонии ҳамаҷонибаи худро пайдо кард ва Қатъномаи даҳлдори махсус оид ба эълон гаштани соли 2025 ҳамчун “Соли байналмилалия ҳифзи пиряҳо” тасдиқ карда шуд.

Раиси Кумита Шерализода Б. А. ҳамчунин дар бораи рафти омодагии Тоҷикистон ба Конфронси байналмилалии сатҳи баланд оид ба ҳифзи пиряхҳо, ки моҳи майи соли 2025 баргузор мешавад, маълумот дод.

Хонум Ясмин Сиддиқ, мудири шуъбаи муҳити зист, захираҳои табиӣ ва кишоварзии Бонки Осиёии Рушд низ дидгоҳ ва дастгирии худро барои ҳалли мушкилоти марбут ба иқлим ва он иқдомҳои глобалӣ, бахусус ташаббуси Президенти Ҷумҳурии Тоҷикистон муҳтарам Эмомалӣ Раҳмон оид ба ҳифзи табиат ва пиряхҳо, ки аз ҷониби аксарияти кишварҳои UNGA дастгирӣ карда шуданд, изҳор дошт.

Мавсуф, аз ҷумла қайд кард, ки Бонки Осиёии Рушд ҳамчун як бонки иқлим тадбирҳои мутобиқшавӣ ба тағйирёбии иқлимро фаъолона дастгирӣ менамояд. Номбурда ба хусус, дар бораи барномаи ба наздикӣ қабулшуда, ки аз ҷониби Бонки Осиёии Рушд ва Хазинаи Иқлими Сабз маблағгузорӣ мешавад, суханронӣ намуд. Ҳадафи барномаи мазкур ҳамгироии ҳифзи муҳити зист ва кишоварзии устувор мебошад.

Дар мусоҳибаҳои анҷомдодашуда аҳамияти ҳамкориҳои байналмилалӣ ва ҳамбастагии ҷомеаи ҷаҳонӣ бо ташаббуси глобалии Президенти Ҷумҳурии Тоҷикистон муҳтарам Эмомалӣ Раҳмон оид ба эълон намудани соли 2025 “Соли байналмилалии ҳифзи пиряхҳо” ҳамчун тадбири мубориза бо тағйирёбии иқлим ва муҳофизати сарватҳои табиӣ таъкид карда шуд.