Қабули Шарҳи чоруми фаъолияти экологии Ҷумҳурии Тоҷикистон             

                                          

Рӯзи 7 ноябри соли 2024 дар шаҳри Женева зимни ҷаласаи Иҷлосияи 29-уми Кумитаи сиёсати экологии Комиссияи иқтисодии СММ барои Аврупо (UNECE) Шарҳи чоруми натиҷаҳои фаъолияти экологии Тоҷикистон бо иштироки роҳбарияти Кумитаи ҳифзи муҳити зисти назди Ҳукумати Ҷумҳурии Тоҷикистон қабул карда шуд.

Бояд қайд намуд, ки Комиссияи иқтисодии СММ барои Аврупо (UNECE) аз байни 56 давлати аъзои худ нахуст Шарҳи чоруми натиҷаҳои фаъолияти экологии Тоҷикистонро қабул намуд. Ин аз он шаҳодат медиҳад, ки кишвари мо аксарияти тавсияҳои шарҳҳои якуму дуюм ва сеюмро бо муввафақият иҷро намуд.

Дар ҷаласа муовини якуми раиси Кумита Қиёмзода З.С. бо сухани ифтитоҳӣ ва сардори Раёсати мониторинг, сиёсати экологӣ, обуҳавошиносӣ ва кадастри Кумита Шукурзода Исфандиёр дар мавзуи «Тоҷикистон: дастовардҳои асосӣ ва мушкилоти экологӣ барои Ҳадафҳои рушди устувор» бо рӯнамо баромад намуданд.

Аз ҷумла қайд гашт, ки Шарҳи мазкур ҷиҳати беҳтар намудани идоракунии муҳити зист ва баланд бардоштани самаранокии фаъолияти экологӣ мусоидат менамояд. Дар он арзёбии пешрафти давлат дар соҳаи ҳифзи муҳити зист, мувофиқаи вазифаҳои экологию иқтисодӣ ва риояи уҳдадориҳои байналмилалӣ дар ҳама бахшҳо инъикос ёфтаанд.

Зимни баррасии лоиҳаи мазкур тавсияҳои коршиносони байналмилалӣ доир ба натиҷаҳои фаъолияти экологии Тоҷикистон аз ҷониби намояндагони Кумита муҳокима ва қабул гардиданд. Баррасии шарҳи натиҷаҳои фаъолият дар соҳаи ҳифзи муҳити зист дар Ҷумҳурии Тоҷикистон аҳамияти рушди устувор ва ҳифзи муҳити зистро барои наслҳои оянда таъмин менамояд.

Дар ҷаласа зикр гардид, ки Тоҷикистон аз дастовардҳои худ дар соҳаи экологӣ ифтихор дорад ва талошҳои худро барои ба даст овардани муваффақият боз ҳам идома медиҳад.