Бунёди партовгоҳҳои замонавӣ дар шаҳри Душанбе             

                                          

Дар доираи иҷрои дастуру супоришҳои Раиси шаҳри Душанбе баҳри беҳтар намудани ҳолати экологии нуқтаҳои партовҷамъкунӣ имрӯзҳо дар назди биноҳои замонавии бунёдшаванда нуқтаҳои махсуси партовҷамъкунии зеризаминӣ, ки бо технологияи ҳозиразамон бунёд мешаванд, мавриди истифода қарор дода шуданд.

Тибқи иттилои Сарраёсати ҳифзи муҳити зист дар шаҳри Душанбе бо мақсади риояи фарҳанги шаҳрнишинӣ, маърифат ва тарбияи экологӣ дар ҷомеа ва покизаву озода нигоҳ доштани гирду атрофи биноҳои баландошёна нуқтаҳои махсуси партовҷамъкунии зеризаминӣ аз ҷониби сохтмончиён сохта шуда, мутобиқ ба талаботҳои экологӣ партовҳо бо навъҳо ҷудо гашта, сипас ба қуттиҳо ҷойгир карда мешаванд.

Масалан, дар ҳар қуттӣ ҷойгир намудани кадом навъ партов навишта шудааст. Чунин тарзи муносибат ба партов имконият медиҳад, ки шаҳрвандон дар алоҳидагӣ партовро ба навъҳо ҷудо намуда, сипас онро ба қуттиҳо гузоранд. Яъне, бо баланд гардидани маърифатнокии экологии аҳолӣ ва муносибати дилсӯзонаи шаҳрвандон нисбат ба муҳити зист шароите фароҳам оварда мешавад, ки покизагии муҳити зист таъмин гашта, шаҳрвандон дар муҳити поку озода кор ва фаъолият намоянд.

Бо мақсади иҷрои қарори Раиси шаҳри Душанбе дар бораи “Соли маърифати экологӣ” эълон намудани соли 2024 таъмир ва азнавсозии нуқтаҳои партовҷамъкунӣ идома ёфта, дар ин росто ҷиҳати пешгирӣ намудани ҳолатҳои дар ҷойҳои номувофиқ ҷойгир намудани партов дар 50 нуқтаи осебпазири ҳудуди ноҳияҳои пойтахт камераҳои мушоҳидавӣ насб карда шуда, ҳамарӯза назорат бурда мешавад.

Таъкид менамоем, ки тозагии гирду атрофи биноҳои истиқоматӣ, атрофи нуқтаҳои партовҷамъкунӣ, новаҳои обгузар, соҳили дарёву рудхонаҳо ва шафати роҳҳо бевосита ба фаъолияти ҳамарӯзаи шаҳрвандон сахт марбут аст. Зеро мушоҳидаҳо нишон медиҳад, ки то ҳанӯз шаҳрвандон дарк накардаанд, ки ҷойгир намудани партов дар нуқтаҳои партовҷамъкунӣ дар вақти муайян муқаррар карда шудааст.

Сарраёсати ҳифзи муҳити зист дар шаҳри Душанбе таваҷҷуҳи сокинонро ба масъалаҳои ҳифзи муҳити зист махсусан ба ҷойгир намудани партов дар нуқтаҳои махсус ҷалб намуда, мутмаинем, ки дар истифодаи партовгоҳҳои замонавӣ аз талаботҳои муқарраргашта истифода намуда, таъмини тозагиву озодагии пойтахти азизамонро риоя менамоянд.