Конфронси миллии Pre-COP29: Харитаи роҳи Тоҷикистон барои 29-умин Конфронси тарафҳои Конвенсияи қолабии СММ оид ба тағйирёбии иқлим               

                                          

14 октябри соли 2024 дар меҳмонхонаи “Ҳаятт Риҷенсӣ” Конфронси миллии Pre-COP29: Харитаи роҳи Тоҷикистон барои 29-умин Конфронси тарафҳои Конвенсияи қолабии СММ оид ба тағйирёбии иқлим баргузор гардид. Конфронси мазкур бо иқдоми Кумитаи ҳифзи муҳити зисти назди Ҳукумати Ҷумҳурии Тоҷикистон дар ҳамкорӣ бо шарикони рушд бо иштироки намояндагони вазорату идораҳои кишвар, ҷавонон ва бахши хусусӣ баргузор гардид.

Чорабинии мазкур бо сухани ифтитоҳии намояндаи Кумитаи ҳифзи муҳити зисти назди Ҳукумати Ҷумҳурии Тоҷикистон, Намояндагии Хазинаи кӯдакони Созмони Милали Муттаҳид (UNICEF) дар Тоҷикистон, Ҳукумати Швейтсария ва Шабакаи Оғохон оид ба рушд дар Тоҷикистон ҳусни оғоз бахшиданд.

Ҳадаф аз баргузории Конфронс ин баррасии ташаббусҳои Ҷумҳурии Тоҷикистон дар мубориза бо мушкилотҳои иқлимӣ, масъалаҳои муаррифии пешравӣ ва дастовардҳои кишвар дар ҷаласаҳои қаблии Конфронси Тарафҳо, мусоидат дар табодули дониш ва таҷрибаҳои беҳтарин вобаста ба мутобиқшавӣ ва пешгирии тағйирёбии иқлим ва таъкид намудани аҳамияти ҳифзи аҳолии осебпазир, бахусус кӯдакон мебошад.

Дар чорабинии мазкур аз ҷониби мутахассисони Кумита, шарикони рушд ва ҷавонон вобаста ба мавзуҳои зерин тариқи рӯйнамо пешкаш гардиданд:

- баррасии Павилиони пиряхҳо – 2025 дар COP 29;

- рушд ва пешрафти аввалин Ҳисоботи дусолаи шаффофият дар Тоҷикистон

- пешрафти татбиқи Саҳми дар сатҳи миллӣ муайяншудаи Тоҷикистон

- маълумоти ЮНИСЕФ дар бораи таъсири иқлим ба кӯдакон

- дастовардҳои Агентии Оғохон оид ба макони зист (АКАН) дар мубориза бо тағйирёбии иқлим

- вазъи кунунӣ ва маълумотҳо дар бораи Нақшаи Миллии Мутобиқшавӣ (NAP)

- нақшаи амали шабакаи мубоиҳасаронии ҷавонон дар мавзӯъи об ва иқлим