Фаъолияти Кумита ва мақомоти зертобеи он дар семоҳаи сеюми соли 2024 натиҷагирӣ карда шуд               

                                          

10 октябри соли 2024 дар шаҳри Душанбе ҷаласаи мушовараи Кумитаи ҳифзи муҳити зисти назди Ҳукумати Ҷумҳурии Тоҷикистон баргузор гардид. Дар рӯзномаи маҷлис масъалаҳо «Дар бораи натиҷаҳои фаъолияти Кумита дар семоҳаи сеюми соли 2024 ва вазифаҳо барои ҷамъбасти сазовори соли 2024» мавриди баррасӣ қарор дода шуданд.

Дар ҷаласаи мазкур масъулони сохтории дастгоҳи марказии Кумита, марказу муассисаҳои тобеи он, аз ҷумла директорони Агентии обуҳавошиносӣ, МД “Ҳудудҳои табиии махсус муҳофизатшаванда”, сардорон ва дигар масъулони сарраёсатҳои ҳифзи муҳити зист дар ВМКБ, вилоятҳо, шаҳри Душанбе, раёсати ҳифзи муҳити зист дар минтақаи Кӯлоб, шуъбаю бахшҳои ҳифзи муҳити зист дар ноҳияҳои ҷумҳурӣ иштирок доштанд.

Тибқи тартиби муқарраргардида баъд аз муайян гардидани регламенти кори ҷаласаи муошовара оид ба натиҷаҳои фаъолияти мақомоти ҳифзи муҳити зист дар 9-моҳаи мазкур муовини раиси Кумита Раҳмонзода Л.Ш. бо маърӯзаи ҳисоботии таҳлилӣ баромад намуд.

Дар муҳокимаи масъала раиси Кумита Шерализода Баҳодур Аҳмадҷон ва дигар аъзои мушовара иштирок намуда, оид ба камбудиву норасоиҳои ҷойдошта дар самтҳои фаъолияти сохторҳо изҳори назар намуданд.

Ҳамзамон, дар ҷаласаи мушовараи Кумита ҳисоботи сардори Сарраёсати ҳифзи муҳити зисти вилояти Хатлон Собирзода Қ., иҷрокунандаи вазифаи сардори раёсати ҳифзи муҳити зист дар минтақаи Кӯлоб Раҳмоналии М., муовини сардори Сарраёсати ҳифзи муҳити зист дар вилояти Суғд Абдумаликзода Б., Сарраёсати ҳифзи муҳити зист дар шаҳри Душанбе Назирзода А., оид ба фаъолияти самтҳои марбутаи худ ҳисобот доданд.

Раиси Кумита Шерализода Б. А., ҷиҳати ҳарчи зудтар бартараф намудани камбудиву норасоиҳои ҷойдошта дар ҷойҳо, масъулияти баланд доштан дар фаъолияти хизмати давлатӣ, оид ба пешбурди ҳифзи муҳити зист, таъмини амнияти экологии аҳолӣ ва баланд бардоштани сатҳи маърифати экологии аҳолӣ, бо назардошти риояи қатъии тартибу низоми қоидаҳои мавҷуда ба масъулони дахлдор дастуру супоришҳои мушаххас дода, масъалаҳои омодагии ҳамаҷониба ба конференсияи “Соли байналмилалии ҳифзи пиряхҳо” дар соли 2025, татбиқи самараноки «Барномаи давлатӣ оид ба кабудизоркунии Ҷумҳурии Тоҷикистон барои давраи то соли 2040», такмили рақамикунонии муҳити зист, масъалаҳои муомилот бо партовҳо ва тозагӣ, бо натиҷаҳои сазовор ҷамъбаст намудани фаъолияти мақомоти соҳавӣ дар соли 2024 ва дигар масъалаҳои дахлдор мавриди таваҷҷуҳи иштирокдорон қарор дода шуданд.

Вобаста ба масъалаҳои баррасигардида, таклифу пешниҳодҳо ва супоришҳои додашуда қарори дахлдори ҷаласаи мушовара муҳокима гардида, пас аз қабул барои корбарӣ ба тамоми сохторҳои дахлдори тобеи Кумита ҷиҳати андешидани чораҳои зарурӣ фиристода мешавад.