Вохӯрии раиси Кумитаи ҳифзи муҳити зисти назди Ҳукумати Ҷумҳурии Тоҷикистон бо намояндаи махсуси вазорати корҳои хориҷии Русия               

                                          

20 сентябри соли 2024 вохӯрии раиси Кумитаи ҳифзи муҳити зисти назди Ҳукумати Ҷумҳурии Тоҷикистон Шерализода Баҳодур Аҳмадҷон бо Сафир оид ба супоришҳои махсус, намояндаи махсуси вазорати корҳои хориҷии Русия оид ба масъалаҳои иқлим, Кононученко Сергей Борисович баргузор гардид.

Зимни мулоқот масъалаҳои ҳамкориҳои дуҷонибаи минтақавӣ оид ба татбиқи се конвенсия, аз қабили конвенсияҳо оид ба гуногунии биологӣ, тағйирёбии иқлим ва мубориза бо биёбоншавӣ баррасӣ шуданд. Иштироки ҳайати Тоҷикистон дар конфронсҳои Тарафҳо оид ба се конвенсияи мавриди назар, таҳияи мавқеи ягона оид ба қабули қарорҳо, ташкили вохӯриҳои дуҷониба ва бисёрҷониба дар раванди конфронсҳои Тарафҳо оид ба татбиқи конвенсияҳои мазкур мавриди таваҷҷуҳи тарафҳо қарор гирифтанд.

Ҷонибҳо бо ҳусни тафоҳум ба таҳкими ҳамкориҳо оид ба масъалаҳои экологии кишварҳо таваҷҷӯҳ зоҳир намуданд.