Баргузории аксияи “Тозагии соҳил” дар шафати  рости маҷрои “Дарёи Душанбе” дар пойтахт               

                                          

21 сентябри соли 2024 бо иқдоми Кумитаи ҳифзи муҳити зисти назди Ҳукумати Ҷумҳурии Тоҷикистон дар якҷоягӣ бо Ширкати Coca-Cola дар соҳили рости маҷрои “Дарёи Душанбе” дар наздикии маҷмааи савдои “Ёвар” ва пули поезд дар пойтахт бахшида ба Рӯзи ҷаҳонии поксозӣ  аксияи экологии “Тозагии соҳил” баргузор гардид.

Аз ҷумла дар чорабинии мазкур,  Раиси Кумитаи ҳифзи муҳити зисти назди Ҳукумати Ҷумҳурии Тоҷикистон Шерализода Баҳодур  Аҳмадҷон,  Директори генералии Ширкати Coca-Cola Бурак Атеш, Намояндаи доимии Гурӯҳи  Бонки Ҷаҳонӣ дар Тоҷикистон, минтақаи Аврупо ва Осиёи Миёна Озон Севимли иштирок намуданд.

Дар оғози чорабинӣ, раиси Кумита Шерализода Б. А. суханронӣ намуда, изҳор дошт, ки Кумита баҳри беҳдошти муҳити зист, аз ҷумла аз ашёи пластикӣ тоза намудани табиат ҳамкориро бо ҳамаи ташкилоту муассисаҳо, новобаста аз шакли моликият ба роҳ монда, иқдомҳои мавриди назар дар шаҳри Душанбе аз ҷумлаи чорабиниҳои навбатӣ мебошад. Хоса қайд гардид, ки имсол бо пешниҳоду иқдомҳои созандаи Раиси шаҳри Душанбе муҳтарам Рустами Эмомалӣ  дар шаҳри Душанбе ҳамчун “Соли маърифати экологӣ” эълон гардидааст, ки ҳар як сокини пойтахт дар тозагию озодагӣ ва ба дигарон талқин намудани маданияти экологии шаҳрнишинӣ мусоидат намояд.

Иштирокдорон, ки дар миёни онҳо кормандони дастгоҳи марказии Кумита, Сарраёсати ҳифзи муҳити зист дар шаҳри Душанбе, дигар иштирокдорон бо шиору овезаҳои тарғиботӣ ва бо гурӯҳҳо ҷудо гардида, дар раванди аксияи мазкур якдилона иштирок намуда, саҳми худро дар тозаю озода намудани муҳити атроф гузоштанд.

Бояд тазаккур дод, ки дар қисмати ифтитоҳи чорабинии мазкур аз тарафи раиси Кумитаи ҳифзи муҳити зисти назди Ҳукумати Ҷумҳурии Тоҷикистон ба якчанд ширкатҳои тиҷоратии ҳамкор барои мусоидат ва саҳмгузорӣ дар ташкил ва баргузории морофони дави байналмилалӣ, ки дар “Ҳафткӯл”-и Панҷакент аввалҳои моҳи сентябри соли ҷорӣ баргузор гардида буд, Сипосномаи Кумитаи мазкур дар вазъияти тантанвӣ супорида шуданд.