Дар доираи баргузории Эко-ниммарафони кӯҳӣ бо ташаббуси Кумитаи ҳифзи муҳити зисти назди Ҳукумати Ҷумҳурии Тоҷикистон  ва ҷиҳати татбиқи “Барномаи давлатии маҷмӯии рушди тарбия ва маърифати экологии аҳолии Ҷумҳурии Тоҷикистон барои солҳои 2021-2025” дар мавзеи Ҳафткӯлии шаҳри Панҷакенти вилояти Суғд аксияи экологии “Тозагии соҳил” ва ҳашари дастаҷамъона баргузор гардид.

Дар доираи чорабинии мазкур соҳили “Ҳафткӯл” аз партовҳо ва ифлосиҳо тоза гардид, дар ҳамоиш  беш аз 350 нафар  варзишгарон ва кормандони касбу кори гуногун фаъолона иштирок намуданд.

Ин тадбир, ҳамзамон бо мақсади татбиқи ҳадафҳои Даҳсолаи байналмилалии амал «Об барои рушди устувор, солҳои 2018-2028», ба роҳ мондани корҳои ободонию созандагӣ, беҳбуд бахшидан ба вазъи экологии маҳалҳо ва баланд бардоштани сатҳи маърифати экологии аҳолӣ дар мавзеи соҳили “Ҳафткӯл” амалӣ гардид.