Иштироки Кумита ва сохторҳои он дар намоишгоҳи “Иди тарбуз харбуза ва каду” дар шаҳри Душанбе               

                                          

Дар доираи Нақшаи чорабиниҳои “Фестивал, намоиш, ид ва озмунҳои анъана ва ҳунарҳои мардумӣ дар Ҷумҳурии Тоҷикистон барои соли 2024” санаи 25 августи соли ҷорӣ дар Муассисаи давлатии “Боғи фарҳангию фароғатии ба номи Абулқосим Фирдавсӣ”-и шаҳри Душанбе бо ибтикори Вазорати кишоварзии Ҷумҳурии Ҷумҳурии Тоҷикистон ва Мақомоти иҷроияи ҳокимияти давлатии шаҳри Душанбе “Иди тарбуз, харбуза ва каду” баргузор гардид.

Дар Намоишгоҳи мазкур вазорату идораҳо, ташкилоту муассисаҳо, боғдорону кишоварзон, корхонаҳои истеҳсолии маҳсулоти аз ҷиҳати экологӣ тоза, аз шаҳру ноҳияҳои ҷумҳурӣ бо дастовардҳои худ иштирок намуданд. Дар баробари дигарон дастовардҳои Кумитаи ҳифзи муҳити зисти назди Ҳукумати Ҷумҳурии Тоҷикистон, аз ҷумла ташаббусҳои ҷаҳонии Ҷумҳурии Тоҷикистон оид ба ҳадафҳои Даҳсолаи байналмилалии амал “Об барои рушди устувор, солҳои 2018-2028”, соли 2025, ҳамчун “Соли байналмилалии ҳифзи пиряхҳо”, манбаъҳои обӣ ва манзараву табиати нотакрори Тоҷикистон ба маъраз гузошта шуд.

Иштироккунандагон ҳадаф аз баргузории чорабинии мазкурро тарғиби рушди маҳсулоти кишоварзӣ, муаррифии дастранҷи деҳқонон, эҳё намудани анъанаҳои парвариши навъҳои гуногуни тарбуз, харбуза, каду ва дигар намудҳои меваҳои ватанӣ арзёбӣ намуданд.

Дар чорабинии мазкур намояндагони сохторҳои Ҳукумати Ҷумҳурии Тоҷикистон, роҳбарону дигар кормандони сафоратхонаҳо, созмону ташкилотҳои муқими кишвар, меҳмонҳои хориҷӣ ва сокинони пойтахт иштирок намуда, аз тамошои дастовардҳои бамаъразгузошта таассуроти нек бардоштанд.