Маҳфили навбатии экожурналистон дар ҶДММ “Эҳёи фулузот”               

                                          

Дар доираи нақшаи ташкил ва гузаронидани маҳфилҳои экожурналистони Кумитаи ҳифзи муҳити зисти назди Ҳукумати Ҷумҳурии Тоҷикистон дар соли 2024 санаи 17 августи соли ҷорӣ дар ҶДММ “Эҳёи фулузот” маҳфили навбатии экожурналистон баргузор гардид.

Дар аввал аъзои маҳфил аз рафти фаъолияти ҶДММ “Эҳёи фулузот”, ки ба истеҳсоли арматура машғул аст, шинос шуданд. Дар ин бора масъулони корхонаи мазкур ба иштирокдорон маълумоти зарурӣ пешниҳод намуданд.

Тавре маълум гардид корхонаи мазкур аз оҳанпораҳое, ки ба табиат партофта мешаванд арматура истеҳсол менамояд. Дар бозори дохилӣ ба чунин маҳсулоти сохтмонии хушсифати ватанӣ ва бо нархи дастрас талабот зиёд аст. Зимни суҳбат маълум гардид, ки корхонаи мазкур барои рақобатпазир намудани маҳсулоти худ тадбирҳои зарурӣ андешида, таҷҳизоти ҳозиразамони заруриро аз хориҷи кишвар харидорӣ ва насб намудааст. Ин аст, ки дар озмуни “Маҳсулот ва хизматрасонии беҳтарин дар Ҷумҳурии Тоҷикистон” дар соли 2023 ҶДММ “Эҳёи фулузот” аз тарафи Агентии стандартизатсия, метрология сертификатсия ва нозироти савдои назди Ҳукумати Ҷумҳурии Тоҷикистон (Тоҷикстандарт) сазовори ҷои ифтихорӣ гардидааст.

Боиси тазаккур аст, ки тибқи талаботи ҷории экологӣ ҷиҳати пешгирӣ аз ифлосшавии ҳавои атмосфера дар корхона полоишҳои пуриқтидор насб гардидааст, ки дуди оҳани гудохташударо дар сатҳи зарурӣ фурӯ менишонад.

Сипас, дар бинои маъмурии корхонаи болозикр бозомӯзии экожурналистон доир гардида, дар он оид ба мавзуи муомилот бо партовҳо муовини сардори Раёсати назоратии давлатии истифода ва ҳифзи замин, канданиҳои фоиданоки маъмули умум ва муомилот бо партовҳои Кумитаи ҳифзи муҳити зист Наимҷон Неъматзода баромад намуд.

Қисмати дигари бозомӯзӣ бахши саволу ҷавобро дарбар гирифт, иштирокдорони маҳфили экологӣ ба саволҳои пешниҳоднамудаи худ аз ҷониби мутахассисони Кумитаи ҳифзи муҳити зист ва ҶДММ “Эҳёи фулузот” ҷавобҳои мушаххас гирифтанд.