7 майи соли 2024 ба иқдоми Кумитаи ҳифзи муҳити зисти назди Ҳукумати Ҷумҳурии Тоҷикистон дар Китобхонаи миллӣ ҷаласаи ҷамъбастӣ оид ба фаъолияти лоиҳаи “Барномаи мутобиқшавӣ ба тағйирёбии иқлим ва кам кардани таъсири он дар ҳавзаи Баҳри Арал, маблағгузории иловагӣ” баргузор гардид.

Дар ҷаласа муовини раиси Кумитаи ҳифзи муҳити зисти назди Ҳукумати Ҷумҳурии Тоҷикистон Мавлодод А. М. иштирок ва суханронӣ намуда, аз ҷумла қайд карда шуд, ки татбиқи чунин лоиҳаҳои сармоягузорӣ бо мусоидати Ҳукумати Ҷумҳурии Тоҷикистон дар ноҳияҳои зерҳадаф баҳри беҳдошти муҳити зист, мутобиқшавӣ ба тағйирёбии иқлим ва баланд бардоштани сатҳи некуаҳолии мардум мусоидат менамояд.

Дар рафти баргузории ҷаласа ҳамоҳангсозон ва масъулони Барнома оид ба “Идоракунӣ, дигар фаъолиятҳои лоиҳа”, “Барқарорсозӣ ва идоракунии муштараки чарогоҳҳо дар ноҳияҳои зерҳадафи лоиҳа”, “Барқарорсозӣ ва идоракунии захираҳои об дар Ассотсиатсияҳои истифодабарандагони об”, “Масъалаҳои гендерӣ ва иҷтимоӣ дар лоиҳа”, “Мониторинг ва арзёбӣ оид ба натиҷаҳои ниҳоии лоиҳа”-и мавриди назар бо маърӯзаҳо ва рӯйнамоҳо баромад намуданд.

Ба иштирокдорон дастурҳо оид ба Қонуни Ҷумҳурии Тоҷикистон “Дар бораи ассотсиатсияи истифодабарандагони об”, Қонуни Ҷумҳурии Тоҷикистон “Дар бораи чарогоҳ” ва дастур оид ба идоракунии экологӣ ва беҳдошти чарогоҳ дар минтақаҳои кӯҳӣ дар шакли китобча дастрас карда шуда, ҳамзамон оид ба истифодабарии самараноки минбаъдаи техникаю таҷҳизоти дар доираи лоиҳаи мазкур ба истифодабарандагони мавзеъҳои зерҳадаф дастрасгардида машваратҳо дода шуданд.