Наврӯзи хуҷастапай рамзи офариниши ҳаёт, эҳёи табиат, яке аз суннатҳои қадимтарин ва фарҳанги зиндаи мардуми тоҷику форс мебошад, ки он имрӯз мақоми ҷаҳонӣ гирифта, арзишҳои миллии моро ба ҷаҳониён муаррифӣ менамояд.

Дар чорабиние, ки санаи 18 марти соли 2024 бо иштироки кормандни Кумитаи ҳифзи муҳити зисти назди Ҳукумати Ҷумҳурии Тоҷикистон ва зерсохтори он бо шукуҳу шаҳомати хос таҷлил гардид, нотиқон Наврӯзро ҳамчун ибтидои ҳамаи бунёдкориҳо ва амалӣ гаштани орзуву ниятҳои нек арзёбӣ карданд.

Аз ҷумла, зимни суханони табрикотии худ раиси Кумита Шерализода Баҳодур Аҳмадҷон қайд намуданд, ки чун анъана тамоми мақомоти давлатии кишвар, аз ҷумла Кумитаи ҳифзи муҳити зист, мақомоти зертобеи он, бахшида ба таҷлили Иди Наврӯз кӯшиш ба харҷ медиҳанд, ки пешоҳанги корҳои ободониву созандагӣ, кабудизоркунӣ, ниҳолшинонӣ, тозаю озода нигоҳ доштани шаҳру деҳоти ҷумҳурӣ бошад, то ин ки ба симои Ватани азизамон ҳусну таровати нав зам гашта, вазъи санитарию экологии ҷумҳурӣ боз ҳам солим гардад.

Тибқи нақшаи чорабиниҳои рӯидастгирифтаи Кумита, дар Наврӯзи имсола, ҳунарҳои дастӣ ва ашёву лавозимоти рӯзгори ниёгонамон дар мисоли ҳунарҳои мардумии вилоятҳои Бадахшону Хатлон, Суғд ва ноҳияҳои тобеи марказ ба маърази тамошо гузошта шуд. Инчунин, манзараи наврӯзиро ороиши дастархони ҳафтсину ҳафтшин ва хони таомҳои миллӣ зиннат доданд. Рамзҳои анъанавӣ чун Маликаи Наврӯзу Бобои деҳқон чорабиниро ҳусну ҷилваи ба худ доданд.

Сурудхониву қироати шеър, мусобиқаҳои варзишӣ, аз қабили бандкашӣ, бозиҳои шоҳмоту шашка, тенниси рӯимизӣ ва дигар бозиҳои хоси наврӯзӣ бахшҳое аз чорабиниҳои Кумитаро ташкил доданд.

Дар охир ба ғолибони бахшҳои хонҳои наврӯзӣ, ҳунарҳои мардумӣ, анвои ҳафтсину ҳафтшин ва ғолибони мусобиқаҳо туҳфаҳои хотирмон супорида шуд.