Андешидани тадбирҳои экологӣ дар ноҳияи Кӯшониён             

                                          

Дар доираи иҷрои дастуру супоришҳои раиси Кумитаи ҳифзи муҳити зисти назди Ҳукумати Ҷумҳурии Тоҷикистон ҷиҳати беҳдошти муҳити зист аз партовҳои пластикӣ бо ташаббуси шуъбаи ҳифзи муҳити зисти ноҳияи Кӯшониён дар ҳудуди шаҳраки Исмоилӣ Сомонӣ ва ҳамчунин шоҳроҳои ноҳияи мазкур зиёда аз 10 адад қуттиҳои санитарӣ барои ҷамъоварӣ намудани қуттиҳои пластикӣ насб карда шуд.

Ин иқдоми наҷиб ҷиҳати таъмини тозагии ҳифзи муҳити зист, баланд бардоштани маърифати экологӣ миёни сокинон ва тарғиби фарҳангу маданияти волои шаҳрнишинӣ арзёбӣ мегардад. Зеро солҳои охир бинобар афзоиши истеҳсол ва истифодаи маводи пластикӣ ва аз беэътиноии баъзе сокинон дар кӯчаву хиёбонҳо зарфу дигар маводҳои пластикӣ зиёд ба назар мерасанд, ки ҳусни ноҳияро коста мегардонанд.

Масъулини шуъбаи ҳифзи муҳити зисти ноҳияи Кӯшониён дар назди худ мақсад гузоштаанд, ки дар якҷоягӣ бо дигар соҳаҳои хоҷагии халқ аз ҷумла муассисаҳои таълимиву тарбиявӣ ва масъулони муассисаҳои фарҳангӣ дар тамоми кӯчаву маҳаллаҳо ва нуқтаҳои ҷамъиятии ноҳияи Кӯшониён чунин қуттиҳоро ҷойгир намоянд.