23 ноябри соли 2023 дар ноҳияи Шаҳристон маросими ифтитоҳи Бонки тухмии ҷамъиятӣ бо иштироки намояндагони мақомоти иҷроияи ҳокимияти давлатии ноҳияи Шаҳристон, Кумитаи ҳифзи муҳити зисти назди Ҳукумати Ҷумҳурии Тоҷикистон ва Созмони озуқаворӣ ва кишоварзии (ФАО) баргузор гардид.

Бонки тухмӣ дар доираи лоиҳаи «Мусоидат ба ҳифз ва истифодаи устувори гуногунии агробиологӣ барои баланд бардоштани устувории озуқаворӣ ва ғизо дар Тоҷикистон» таъсис ёфтааст, ки бо дастгирии молиявии Фонди глобалии экологӣ (GEF) амалӣ карда мешавад.

Дар чорабинӣ, маросими ифтитоҳи Бонки тухмӣ бо суханронии ифтитоҳӣ муовини раиси ноҳияи Шаҳристон Мавлонқулзода Раҳмон, Намояндаи ФАО дар Ҷумҳурии Тоҷикистон ҷаноби Олег Гучгелдиев ва намояндаи Кумитаи ҳифзи муҳити зисти назди Ҳукумати Ҷумҳурии Тоҷикистон Шерматов Хисрав дар бораи моҳияти бонки тухмӣ барои ҳифз, нигоҳдорӣ ва барқарорсозии намудҳои маҳаллии растаниҳои кишоварзӣ ва авлодони ёбоии онҳо ва истифодаи онҳо барои устувори гуногунии агробиологӣ суханронӣ намуданд.

Мақсад аз таъсиси бонки тухмӣ нигоҳ доштани навъҳои маҳаллӣ (зироатҳо) ва хешовандони ваҳшии онҳо ва имкон додан ба ҷамоатҳои маҳаллӣ, бахусус занон барои дастрасии устувор ба тухмиҳои гуногуни маҳаллӣ ва имкони ҷамъоварӣ ва нигоҳдории тухмиҳо мебошад.

Дар чорабинии мазкур намояндагони ҷамоати деҳоти маҳаллӣ, Раёсати ҳифзи муҳити зист, Раёсати кишоварзии ноҳияи Шаҳристон, Муассисаи давлатии хоҷагии ҷангал, Кумитаи кор бо занон ва оилаи ноҳияи Шаҳристон, инчунин кормандон Хазинаи байналмилалии рушди кишоварзӣ (IFAD), кооперативи истеҳсолии «Бураген» ва Ассотсиатсияҳои хоҷагиҳои деҳқонӣ, инчунин деҳқонони маҳаллӣ, сокинон, аз ҷумла занон ва мактаббачагон иштирок намуданд.

Дар рафти чорабинӣ аз тарафи намояндаи Созмони озуқаворӣ ва кишоварзии (ФАО) Олег Гучгелдиев ва намояндаи Кумитаи ҳифзи муҳити зисти назди Ҳукумати Ҷумҳурии Тоҷикистон Шерматов Хисрав ба фермерону хоҷагиҳои деҳқонии деҳаи Фирдавсии ноҳияи Шаҳристон таҷҳизоту лавозимот барои боғдорӣ аз қабили маҷмуи асбобҳои боғдорӣ, дорупошак, нардбон ва дигар асбобу таҷҳизотҳо барои пешбурди хоҷагидорӣ дастрас карда шуданд.

Ташкили чунин Бонкҳои тухмӣ дар ноҳияҳои Рашт, Тоҷикобод ва Балҷувон низ дар назар дошта шудаанд, ки амалҳо оид ба ҳифзи гуногунии агробиологии деҳот тавассути ҳифз ва эҳёи захираҳои генетикии маҳаллӣ, зироатҳои кишоварзӣ ва хешовандони ваҳшии онҳо мусоидат менамояд.

Ҳачунин дар доираи лоиҳа ташкил намудани ниҳолхонаҳо ва боғҳои коллексионӣ доир ба ҳифзу нигоҳдории намудҳои маҳалли дарахтони мевадиҳанда ва авлодони ёбоӣ онҳо дар назар дошта шудааст, ки барои барқарорсозии генофонди миллӣ кишвар ва захираҳои генетикӣ саҳми босазое мегузорад.