Маъракаи ниҳолшинонӣ ва кабудизоркунӣ дар ноҳияи Шаҳринав             

                                          

Шуъбаи ҳифзи муҳити зист дар ноҳияи Шаҳринав дар асоси нақшаи чорабиниҳо оид ба муташаккилона гузаронидани корҳои ободонию кабудизоркунӣ барои мавсими ниҳолшинонии тирамоҳу зимистони соли ҷорӣ, 17 ноябри соли 2023 дар шоҳроҳи Душанбе-Ҳисор-Турсунзода аксияи ниҳолшинониро баргузор намуд.

Дар гузаронидани аксияи экологии ниҳолшинонӣ кормандони муассисаи кабудизоркунии ноҳия ва дигар кормандони сохторҳои дахлдор баҳри татбиқи «Барномаи давлатии маҷмӯии рушди тарбия ва маърифати экологии аҳолии Ҷумҳурии Тоҷикистон барои солҳои 2021 - 2025» ҷавонон, донишҷӯён ва хонандагони муассисаҳои таълимӣ ҷалб карда шуданд.

Бо мақсади беҳсозии ҳолати экологии минтақа ва ҳудуди шоҳроҳ дар рафти чорабинӣ зиёда аз 400 бех ниҳолҳои дарахтони сояафкани хамешасабз шинонида шуд. Инчунин, бо мақсади зебову хуррамгардонии ҳудуди ноҳия аз ҷониби шуъба 1500 бех ниҳолҳои гули садбарг дар шоҳроҳ шинонида шуд.

Бояд қайд намуд, ки рафти чорабинии мазкур аз ҷониби муассисаи давлатии телевизиони “Сафина” наворгирӣ гардида, тариқи телевизиони шабакаи мазкур пахш намуд.