Саҳмгузории Донишгоҳи забонҳо дар аксияи экологӣ             

                                          

Дар доираи иҷрои фармоиши раиси Кумитаи ҳифзи муҳити зисти назди Ҳукумати Ҷумҳурии Тоҷикистон бобати беҳбуд бахшидан ба вазъи соҳили дарёву каналҳо, сарчашмаҳои обӣ зери назорати Сарраёсати ҳифзи муҳити зист дар шаҳри Душанбе бо иштироки устодон ва донишҷӯёни Донишгоҳи байналмилалии забонҳои хориҷии Тоҷикистон ба номи Сотим Улуғзода аксияи экологии “Тозагии соҳил” роҳандозӣ гардид.

Аксияи мазкур дар қисмати рости дарёи Душанбе баргузор гардид, ки дар он 200 нафар устодон ва донишҷӯёни Донишгоҳи мазкур фаъолона ширкат намуда, ҳудуди соҳил дар масофаи 165 метри тӯлонӣ тоза гашта, дар ҳаҷми 4,8 м3 партовҳои сахти маишӣ ва пластикӣ ҷамъоварӣ ва бароварда шуд.

Дар ҷараёни ҷамъоварии партовҳо маълум гардид, ки қисмати зиёди партовҳоро зарфҳои пластикӣ ташкил додааст. Воқеан, дар ҷомеаи имрӯза афзоиши партовҳои пластикӣ яке аз мушкилотҳои экологӣ ба ҳисоб меравад, ки таъсири манфии он ба муҳити зист бештар аст.

Дар фарҷоми чорабинии экологӣ аз ҷониби Сарраёсати ҳифзи муҳити зист дар шаҳри Душанбе ба маъмурияти Донишгоҳи байналмилалии забонҳои хориҷии Тоҷикистон ба номи Сотим Улуғзода Сипоснома тақдим карда шуд.