Мактаби экологӣ барои ҷавонон               

                                          

Бо иқдоми Кумитаи ҳифзи муҳити зисти назди Ҳукумати Ҷумҳурии Тоҷикистон ва дар ҳамкорӣ бо Дафтари Барномаҳои Созмони амният ва ҳамкорӣ дар Душанбе дар доираи татбиқи "Барномаи давлатии маҷмӯи рушди тарбия ва маърифати экологии аҳолии Ҷумҳурии Тоҷикистон барои солҳои 2021-2025" аз 19 то 23 августи соли ҷорӣ барои донишҷуён, волонтёрон ва фаъолон  дар  истироҳатгоҳи  “Ёс”-и мавзеи Ромит дар шаҳри Ваҳдат таҳти унвони "Мактаби экологӣ-2023"  ҳафтаи  омӯзиши  экологӣ, ҳифзи муҳити зист, аз ҷумла   тағйирёбии иқлим,  мониторинг сифати ҳавои атмосфера ва муомилот бо зарфҳои пластикӣ силсиламашғулиятҳои омӯзишӣ баргузор гардид.

Дар кушодашавии лагери экологӣ намояндагони Кумитаи ҳифзи муҳити зисти назди Ҳукумати Ҷумҳурии Тоҷикистон  ва  Дафтари  Барномаҳои Созмони амният ва ҳамкорӣ дар Аврупо дар Душанбе иштирок ва суханронӣ намуданд. Қайд карда шуд, ки Ҷумҳурии Тоҷикистон ҳамчун кишвари ташаббускор ва пешсаф дар  ҳалли мушкилоти ҷаҳонии вобаста ба об ва экология  эътироф гардидааст. Аз ҷумла, пешниҳоди панҷуми ҷумҳурии мо оид ба эълон гардидани соли 2025 Соли байналмилалии ҳифзи пиряхҳо бо ҷонибдории кулли аксари кишварҳо аз тарафи Маҷмаи умумии СММ  қабул карда шуд, ки баҳри татбиқи он ҷаҳон иқдомҳои ҳадафмандона пеш гузошта истодаанд.

Сипас, машғулиятҳои панҷрӯза оғоз гардида, ба иштирокдорон масъулони Кумитаи ҳифзи муҳити зисти назди Ҳукумати Ҷумҳурии Тоҷикистон, Дафтари Барномаҳои САҲА дар Душанбе ва Ташкилоти ҷамъиятии "Замини хурд" бо рӯйнамоҳо, овезаю варақаҳои аёнӣ, бозиҳои гурӯҳӣ, намоиши филмҳо ва дигар машғулитҳои шавқовар дарсҳои омӯзишӣ гузаштанд.

Пас аз ҳар як машғулияти гузаронидашуда саволу ҷавоб ва оид ба роҳҳои ҳалли масъалаҳо ва паёмадҳои экологӣ мубоҳисаҳо сурат гирифтанд. Ҳамзамон, намоишгоҳ ташкил гардида, дар он таҷҳизоти маҳсули энергияи офтобӣ ба маъраз гузошта шуд.

Пас аз анҷоми машғулиятҳои омӯзишӣ дар вазъияти тантанавӣ ба          эко-волонтёрон, фаъолон ва донишҷӯён сертификатҳо тақдим карда шуд.

Баргузории чунин чорабиниҳои экологӣ  барои ҳавасмандгардонӣ ва ҷалби эко-волонтёрон, ҷавонон ва фаъолон баҳри тарғиби ҳифзи муҳити зист, иштироки  васеи онҳо дар чорабиниҳои муҳитизистӣ ва ба ин восита   баланд бардоштани сатҳи маърифати экологии аҳолӣ мусоидат менамояд.