Вохӯрии корӣ бо C5+1 оид ба энергетика ва муҳити зист               

                                          

16 августи соли ҷорӣ вохӯрии Кории С5+1 оид ба энергетика ва муҳити зист тариқи маҷозӣ баргузор гардид.

С5+1 формати муколама ва платформаи амалиёти муштарак дар ҳалли мушкилоти муштараки Иёлоти Муттаҳида ва панҷ кишвари Осиёи Марказӣ мебошад. Он муносибатҳои дуҷонибаро дар минтақа, бахусус дар соҳаҳое, ки равиши минтақавӣ метавонад бартариҳои нисбӣ фароҳам орад, мукаммал месозад.

Дар ҷаласаи корӣ коршиносон аз ИМА ва мутахассисони вазоратҳои корҳои хориҷӣ, мақомотҳои ҳифзи муҳити зист ва энергетикаи кишварҳои Осиёи Марказӣ ширкат намуданд.

Ҷаласаро ҷаноби Брайан Стиммлер, муовини ёвари Котиби давлатии ИМА ифтитоҳ намуда, самтҳои асосии ҳамкориҳоро дар формати С5+1 эълон намуда, ба масъалаҳои идоракунии захираҳои об ва рушди энергетика дар кишварҳои Осиёи Марказӣ таваҷҷуҳи хоса дод. Сипас, ҷаноби Брайан Стиммлер суханро ба муовини раиси Кумитаи ҳифзи муҳити зист Мавлодод А.М. дода, ба иштирокчиёни вохӯрии маҷозӣ оид ба чорабиниҳо оид ба ҳифзи захираҳои об, мутобиқшавӣ ба тағйирёбии иқлим, ҳифзи пиряхҳо, обу ҳаво ва инкишоф додани хамкории байналхалкӣ суханрони намуд.

Дар ҷараёни мулоқот мутахассисон дар бораи механизмҳои ҳамкорӣ оид ба идоракунӣ ва ҳифзи захираҳои об, баланд бардоштани басомад ва сифати мубодилаи иттилоот, ҷалби занон ба идоракунии об ва кишоварзӣ маълумот доданд.

Инчунин, масъалаҳои гузариш ба энергияи тоза, аз ҷумла коҳиши партовҳои метан дар Осиёи Марказӣ, иҷрои ӯҳдадориҳои кишварҳо дар чаҳорчӯби саҳми дар сатҳи миллӣ муайяншуда баррасӣ шуд.

Дар фарҷом намояндагони кишварҳо доир ба роҳҳои минбаъдаи ҳамкорӣ дар формати С5+1 андешаҳои худро баён намуданд.