Маҳаллаҳои воридшуда ва ё саҳмгузории аҳолӣ дар таъмини беҳдошти муҳити зист               

                                          

Дар асоси қарори Маҷлиси миллии Маҷлиси олии Ҷумҳурии Тоҷикистон “Дар бораи тағйир додани сарҳадҳои шаҳри Душанбе ва ноҳияи Рӯдакӣ” сарҳади шаҳри Душанбе аз ҳисоби заминҳои ноҳияи Рӯдакӣ дар майдони 7659,25 гектар тағйир дода, масоҳати умумии он 20318, 25 гектар муқаррар карда шуд.

Дар асоси талаботҳои қонунгузориҳои ҳифзи муҳити зист ҷиҳати иҷрои Қоидаҳои тартиботи ҷамъиятӣ, ободонӣ ва санитарӣ дар шаҳри Душанбе, ки бо қарори Маҷлиси вакилони халқи шаҳри Душанбе тасдиқ шудааст, Сарраёсати ҳифзи муҳити зист дар шаҳри Душанбе вазъи экологии маҳаллаҳои воридгаштаро мавриди омӯзиш қарор дода, ба масъулини сохторҳои дахлдори ноҳияҳои Фирдавсӣ, Шоҳмансур ва Сино дастур додааст, то дар беҳсозии муҳити экологии маҳаллаҳои воридшуда чораҷӯи намоянд.

Мутобиқ ба маълумоти мавҷуда, дар маҳаллаҳои воридшуда 33 нуқтаи муваққатии партовҷамъкунӣ сохта шуда, тибқи шартнома бо корхонаҳои партовкашони ноҳияҳо партовҳо аз нуқтаҳои партовкашон ба партовгоҳи шаҳрӣ бароварда мешавад.

Бо дастури Сарраёсати ҳифзи муҳити зист дар шаҳри Душанбе дар муассисаҳои таълимии маҳаллаҳои воридшудаи №33, 34, 37, 105, 106, 107, 109, 165-и ноҳияи Шоҳмансур вобаста ба иҷрои Барномаи давлатии маҷмӯии рушди тарбия ва маърифати экологии аҳолии шаҳри Душанбе, қарори Раиси шаҳри Душанбе “Дар бораи тасдиқи Тартиби ҷамъоварӣ, баровардан, коркард ва безараргардонии партовҳои сахти маишӣ дар ҳудуди марзию маъмурии шаҳри Душанбе” ва фасли 5-и Қоидаҳои тартиботи ҷамъиятӣ, ободонӣ ва санитарӣ дар шаҳри Душанбе, сӯҳбату вохӯриҳо анҷом дода шуд.

Бо инобати солимгардонии муҳити зист, равнақи корҳои ободонӣ, созандагӣ, сабзу хуррамгардонӣ, ҷалби таваҷҷуҳи сокинон ба ҳашар ва аксияҳои экологии “Тозагии маҳал” ва “Тозагии соҳил” ва баланд бардоштани маърифат ва тарбияи экологии аҳолӣ Сарраёсати ҳифзи муҳити зист дар шаҳри Душанбе тасмим гирифтааст, ки тавассути роҳандозӣ намудани аксияҳо ба ҳолати экологии маҳаллаҳо беҳбудӣ бахшида, дараҷаи маърифатнокии экологии шаҳрвандон боло бурда шавад.