Тақдими Китоби сурхи Ҷумҳурии Тоҷикистон ба китобхонаи Масҷиди ҷомеи марказии ш. Душанбе               

                                          

Санаи 19 июли соли ҷорӣ бо ташаббуси Маркази Орхуси Кумита дар якҷоягӣ бо КВД илмию истеҳсолии “Табиат” Каримов А. дар масҷиди ҷомеи марказии шаҳри Душанбе бо маъмурият ва кормандони ин ташкилоти динӣ бо мақсади татбиқи принсипҳои конвенсияи Орхус дар Тоҷикистон ва иҷрои бандҳои “Барномаи давлатии маҷмӯии рушди тарбия ва маърифати экологии аҳолии Ҷумҳурии Тоҷикистон барои солҳои 2021 -2025” дар мавзуи “Таҳкими маърифати экологӣ миёни аҳолӣ ва амалишавии самараноки фаъолияти муҳитизистӣ дар ҶТ” ҷаласаи иттилоотӣ ташкил ва баргузор гардид.

Чорабиниро бо сухани муқаддимавӣ сардори бахши кадрҳо ва ҳуқуқи ташкилоти мазкур Маҳмудов Насим ҳусни оғоз бахшида, зикр намуд, ки масоҳати умумии масҷиди ҷомеи марказии ш. Душанбе 13 гектарро ташкил намуда, маъмурияти ташкилот ба масъалаҳои сабзгардонӣ ва тозагии муҳити атроф таваҷҷуҳи хоса зоҳир менамояд. Ба корҳои ободонӣ ва тозагиву сабзгардонӣ наздики 30 нафар кормандон ҷалб гардидаанд.    

Сипас сардори Маркази Орхуси Кумита Ҷ. Яқубов дар робита ба ташаббусҳои ҷаҳонии Тоҷикистон дар самти обу иқлим, шомил будани Тоҷикистон ба узвияти конвенсияҳои байналмилалии экологӣ, ҳадаф ва принсипҳои конвенсияи Орхус, саъю талошҳои Кумитаи ҳифзи муҳити зист барои амалигардонии сиёсати экологии Ҳукумати ҷумҳурӣ, бахусус дар самти баланд бардоштани сатҳи маърифати экологии аҳолӣ, таъмини амнияти экологии ҷомеа ва  беҳдошти муҳити зист изҳори андеша намуд.

Аз ҷониби сардори КВД ИИ “Табиат” Каримов А. ба ҳозирин дар мавзӯи принсипҳои иқтисоди “сабз” ва ҷараёни амалишавии принсипҳои иқтисоди “сабз” дар Тоҷикистон маърӯза пешниҳод гардид. 

Дар охири ҷаласаи иттилоотӣ аз ҷониби намояндагони Кумита ба китобхонаи масҷиди ҷомеи марказии шаҳри Душанбе Китоби сурхи Ҷумҳурии Тоҷикистон иборат аз ду ҷилд тақдим карда шуд. Ҳамзамон барои намозгузорон варақаҳои иттилоотӣ “Дин покизагӣ аст! Аз ин рӯ пок нигоҳ доштани муҳит нишони имондорист” ва “Зарари пластик ба муҳити зист ва саломатӣ” тақсим карда шуд.