Фаъолияти Кумита ва мақомоти зерсохтори он дар шашмоҳаи   якуми соли 2023 натиҷагирӣ карда шуд               

                                          

12 июли соли 2023 дар шаҳри Душанбе ҷаласаи мушовараи Кумитаи ҳифзи муҳити зисти назди Ҳукумати Ҷумҳурии Тоҷикистон оид ба натиҷагирии фаъолияти мақомоти мазкур ва зерсохтори он дар шашмоҳаи якум ва вазифаҳо барои ҷамъбасти сазовори 9-моҳаи соли 2023 бо иштироки сардорон ва кормандони воҳидҳои сохтории дастгоҳи марказии Кумита, Агентии обуҳавошиносӣ, сардорони сарраёсатҳои ҳифзи муҳити зист дар ВМКБ, вилоятҳо, шаҳри Душанбе, раёсати ҳифзи муҳити зист дар минтақаи Кӯлоб, шуъбаю бахшҳои ҳифзи муҳити зисти шаҳру ноҳияҳои ҷумҳурӣ, дигар роҳбарони ташкилотҳои низоми Кумита ва лоиҳаҳои татбиқшаванда баргузор гардид.

Дар рӯзномаи маҷлис як масъала иборат аз ду бахш, 1-ум: «Дар бораи  натиҷаҳои фаъолияти Кумита дар шашмоҳаи якуми соли 2023;  2: Вазифаҳо барои ҷамъбасти сазовори семоҳаи сеюми соли 2023» мавриди баррасӣ қарор дода шуданд.

Тибқи тартиби муқарраргардида баъд аз муайян гардидани регламенти кори ҷаласаи муошовара оид ба натиҷаҳои фаъолияти мақомоти ҳифзи муҳити зист дар нимсолаи аввали соли 2023 муовини якуми раиси Кумита Қиёмзода З.С. бо маърӯзаи ҳисоботӣ баромад намуд.

Пас аз қироати маърӯзаи ҳисоботӣ аз ҷониби муовини якуми раиси Кумита, сардорони Сарраёсатҳои ҳифзи муҳити зист дар ВМКБ Назаралиев М., дар вилояти Суғд Ғуфронзода А., дар вилояти Хатлон Саидзода И., сардори раёсати ҳифзи муҳити зист дар минтақаи Кӯлоби вилояти Хатлон Соҳибзода Қ. оид ба самтҳои фаъолияташон ҳисобот доданд.

Ҳангоми ироаи маърӯзаи ҳисоботӣ раиси Кумита Шерализода Баҳодур Аҳмадҷон аз масъулини сарраёсатҳо оид ба масъалаҳо ва мушкилоти мавҷудаи зерсохторҳо пурсон шуд ва ҷиҳати ҳарчи зудтар бартараф намудани камбудиву норасоиҳои ҷойдоштаи фаъолияти масъулони сохторҳои Кумита дар ҷойҳо, барои масъулияти баланд доштан дар фаъолияти хизмати давлатӣ, оид ба пешбурди ҳифзи муҳити зист, таъмини амнияти экологии аҳолӣ ва баланд бардоштани сатҳи маърифати экологии аҳолӣ, бо назардошти риояи қатиъии тартибу низоми қоидаҳои мавҷуда дастуру супоришҳои мушаххас дод.

Дар ҷаласаи мушовара муовини сардори Раёсати кишоварзӣ ва ҳифзи муҳити зисти Дастгоҳи иҷроияи Президенти Ҷумҳурии Тоҷикистон Сафарзода Лашкар иштирок ва суханронӣ намуд.

Раиси Кумита Шерализода Б.А. доир ба муҳимияти иҷро намудани Стратегияву Барномаҳои давлатӣ, Нақшаҳои Амал ва дастуру споришҳои додашуда сухан ба амал овард. Ҳамзамон доир ба корҳои омодагӣ ба ворид намудани мамнуъгоҳии Бешаи палангон ба феҳристи ЮНЕСКО, омодагии ҳамаҷониба дидан ба 40 солагии таъсисёбии мамнуъгоҳи давлати табиии “Даштиҷум”, ҷоннок намудани фаъолияти нозирони ҷамъиятӣ ва дигар масъалаҳои соҳавӣ таъкид ба амал оварда шуд.

Вобаста ба ҳамаи масъалаҳои баррасигардида, таклифу пешниҳодҳо ва супоришҳои додашуда қарори дахлдори ҷаласаи Мушовара қабул ва ироа гардида, барои корбарӣ ба тамоми сохторҳои дахлдори тобеи Кумита ҷиҳати андешидани чораҳои зарурӣ фиристода мешавад.