Табрикоти раиси Кумитаи ҳифзи муҳити зисти назди Ҳукумати Ҷумҳурии Тоҷикистон Шерализода Баҳодур Аҳмадҷон бахшида ба Иди Қурбон                 

Кормандони дастгоҳи марказӣ ва мақомоти ҳифзи муҳити зисти ҷумҳурӣ! Шуморо ба фарорасии Иди Қурбон, яке аз идҳои муҳими дини мубини Ислом, табрику таҳният гуфта, бароятон саломатии бардавом, иқболу сарбаландии  ҳамешагӣ ва дар кору пайкоратон муваффақиятҳои нав ба наро таманно дорам.

Ҷавҳари дини мубини Исломро ахлоқи ҳамида ташкил медиҳад. Мо инро дар ояҳои осмонӣ ва ҳадисҳои Ҳазрати Муҳаммад (с) пайғамбар баръало эҳсос менамоем. Тамоми бузургони гузуштаи мо ин панду ҳикматҳои муқаддастро гиромӣ дошта, дар баробари суннатҳои аҷдодӣ  шарҳу тавзеҳ додаанд ва бар пояи он панду андарзҳои ҷаҳоншумул эҷод намуданд.

Басо рамзист, ки санаи 8 июни соли ҷорӣ Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон калонтарин масҷиди намозгузориро дар пойтахти Ватани азизамон шаҳри Душанбе ифтитоҳ намуданд, ки он шаҳодати иқдомҳои наҷиби  Сарвари давлати мо барои сарҷамъии миллат ва аз ҳар гуна равияву эътиқодҳои хуруфотӣ дур будан мебошад.

Тозаву озода нигоҳ  доштани муҳити зист, арҷ гузоштан ба неъматҳои табиат, ки офаридаи Худованд аст, яке аз рукнҳои  исломи аслӣ шуморида мешавад. Тоҷикистони азизи мо дорои табиати биҳиштосо, обҳои софу зулолу мусаффо, чашмаҳои шифобахш, кӯлу дарёҳо олами бойи набототу ҳайвоноти нодир мебошад, ки таваҷҷуҳи меҳмонону сайёҳони дохилию хориҷиро ба худ ҷалб месозад.

Мову Шумо, кормандони мақомоти ҳифзи муҳити зист вазифадорем, ки ин сарзамини дорои ганҷҳои нуҳуфтаи Худодоро оқилона истифодаи намуда, онро ба наслҳои оянда дар ҳолати хубу шоистаи зиндагӣ ба мерос гузорем. Ин амали наку  дар баробари фаризаҳои қуръонӣ савобу  ҷойгоҳеро соҳиб аст.

Бори дигар Шуморо бо Иди Қурбон табрику таҳният гуфта, ба Шумо  дар симои Шумо ба  кулли ҳамватанони азизамон ин рӯзи муқаддасро муборакбод мегӯям. Сиҳатмандиву саодатмандӣ ва некуаҳволии ҳар як оилаи Шумоёнро таманно менамоям.

Идатон муборак, ҳамкорони арҷманд!