Семинари омӯзишӣ доир ба баргузор кардани маъракаи иттилоотӣ оид ба пеститсидҳои куҳнашуда               

                                          

Аз 6 то 9 июни соли ҷорӣ бо мақсади иҷроиши уҳдадориҳои Тоҷикистон дар назди Конвенсияи Стокголм оид ба ифлоскунандаҳои устувори органикӣ дар доираи амалишавии лоиҳаи “Намоишдиҳии коркарди ғайриҳароратии партовҳои дорои дихлордифинил-трихлорметилметан дар кишварҳои Осиёи Марказӣ” аз ҷониби Намояндагии фонди Швейтсарӣ оид ба безараргардонии минаҳо (FSD) дар Тоҷикистон барои намояндагони ташкилоту идораҳои давлатӣ ва ҷамъиятӣ семинар-тренинг баргузор гардид. Тӯли чор рӯз коршиноси байналмилалӣ ҷаноби Оскар Кастенс ба иштирокчиён семинар доир ба тарзи гузаронидани намуди KAP-пурсиш, ҳадафнок анҷом додани маъракаи иттилоотӣ барои дуруст дарк намудани муаммои заҳрхимикатҳои куҳнашуда ва ҷалби ҷомеа барои иштирок дар бартараф кардани хавфҳои эҳтимолии маконҳои заҳрхимикатҳо дарси омӯзишӣ гузаронид. Ҳамзамон аз ҷониби директори Муассисаи давлатии “Маркази миллии иҷрои Конвенсияи Стокгом оид ба ифлоскунандаҳои устувори органикӣ”-и Кумита Ҷӯраев А., намояндагони ташкилоти FSD Давлатова Ш., Маркази Орхуси Кумита Яқубов Ҷ. ва ТҶ “Пешсаф” Улуғов У. презентатсияҳо пешкаш карда шуда, миёни иштирокчиён доир ба таҷрибаи ҳамдигар табодули афкор сурат гирифт.

Дар ҷамъбасти семинари омӯзишӣ муовини якуми Раиси Кумитаи ҳифзи муҳити зисти назди Ҳукумати Ҷумҳурии Тоҷикистон Қиёмзода Зарафо Сӯфиҷон суханронӣ карда, ба вижа, саъю талош ва ҳамкории судманди Кумитаро бо Намояндагии фонди Швейтсарӣ оид ба безараргардонии минаҳо (FSD) дар Тоҷикистон дар мавриди баланд бардоштани сатҳи маърифатнокии аҳолӣ махсус қайд намуд. Аз ҷумла, зикр гардид, ки воситаҳои коммуникатсия як самти муҳим дар татбиқи Конвенсияи Стокголм оид ба ифлоскунандаҳои устувори органикӣ мебошанд. Семинари баргузоргардида механизми муҳими кори шарикони байналмилалӣ ва миллӣ барои Кумитаи ҳифзи муҳити зисти назди Ҳукумати Ҷумҳурии Тоҷикистон мебошад. 

Дар охир аз ҷониби муовини якуми раиси Кумита Қиёмзода З.С. ва роҳбари Дафтари намояндагии Швейтсарӣ оид ба безараргардонии минаҳо (FSD) дар Тоҷикистон ҷаноби Дин Муҳаммад Некхо ба иштирокчиён сертификатҳо супорида шуд.