Семинари омӯзишӣ бахшида ба Рӯзи умумиҷаҳонии замин               

                    

                                                                

20 апрели соли 2023 дар толори Сарраёсати ҳифзи муҳити зист дар вилояти Суғд бахшида ба Рӯзи умумиҷаҳонии замин, ки ҳамасола  22 апрел таҷлил мегардад, семинари омӯзишӣ баргузор гардид. Дар чорабинии мазкур кормандони шуъбаҳои сарраёсат ва мутахассисони бахшҳои ҳифзи муҳити зисти шаҳру ноҳияҳои вилояти мазкур, ки ба назорати самти ҳифзи замин вобаста мебошанд, иштирок доштанд. Тибқи барномаи семинар аз ҷониби сармутахассисон дар мавзуъҳои роҳҳои беҳтар намудани ҳолати мелиоративии заминҳои корами вилояти Суғд, истифодаи захираҳои замин ва оқибати экологии он, маълумоти иттиллотӣ оид ба баргузории Рӯзи Замин, тартиби дуруст ҳисоб намудани зарар ҳангоми ифлос намудани замин баромадҳо шунида шуд.

Ҳамзамон, доир ба масъалаҳои пешгирии эрозия ва биёбоншавии замин, барқарорсозии хати муҳофизатии ҷангал ва корбарӣ ҷиҳати муайян намудани ҳолати расонидани зарар ба захираҳои замин қайд карда шуд.  Дар қисмати муҳокимаи маърӯзаҳо ва таҳлили баромадҳо саволу ҷавоб сурат гирифта, иштирокдорон ба саволҳои худ ҷавобҳои мушаххас гирифтанд.