Сайронгоҳи лола дар Душанбе                                           

Дар муассисаи давлатии “Майдони истиқлол”-и шаҳри Душанбе  давраи ҷамъбастии шаҳрии фестивали гулҳо таҳти унвони “Сайри гули лола” доир гардид.

Бояд зикр намуд, ки фестивали “Сайри гули лола” дар доираи иҷрои амри Президенти Ҷумҳурии Тоҷикистон вобаста ба  вусъат бахшидани корҳои ободонӣ, бунёдкорию созандагӣ, ташвиқи ҳисси зебоипарастӣ, табиатдӯстӣ, баланд бардоштани завқи эстетикӣ, маърифати экологӣ ва оммавигардонии суннатҳои беҳтарини миллӣ дар қаламрави ҷумҳурӣ  роҳандозӣ гардида истодааст.

Толиб Раҳимзода Карим, муовини раиси шаҳри Душанбе зимни суханронӣ зикр намуд, ки мутобиқ ба қарори марбутаи Раиси шаҳри Душанбе  дар доираи  фестивали  гулҳо таҳти унвони “Сайри гули лола” то имрӯз дар ҳудуди гулгашту хиёбон, боғҳои фарҳангу фароғатӣ ва минтақаҳои гуногун ба миқдори 5 млн 700 ҳазору 917 адад гули лола шинонида шуда, воқеан шаҳри Душанберо ба сайронгоҳи гули лола табдил додааст, ки ҳамарӯза мо шоҳиди бевоситаи ин сарсабзию шукуфоии беназир мегардем.

Таъкид гардид, ки бо талошҳо ва раҳнамоиҳои бевоситаи Раиси шаҳри Душанбе муҳтарам Рустами Эмомалӣ шаҳри Душанбе яке аз пештозони корҳои ободонию ниҳолшинонӣ ва гулшинонӣ дар миқёси ҷумҳурӣ маҳсуб ёфта, барандаи шоҳҷоизаҳои озмуни “Сайри гули лола” дар солҳои сипаришуда мебошад.

Бо инобати таъмини сарсабзию шукуфоӣ, тақвияти корҳои ободонию созандагӣ ва гулгулшукуфоии шаҳру ноҳияҳои кишвар бо амри Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон  ибтидо  аз соли 2018 дар қаламрави ҷумҳурӣ озмуни гулҳо “Сайри гули лола”  доир гашта, ҷиҳати эҳёи анъанаҳои миллӣ, ташвиқу тарғиби таҷрибаи пешқадами гулпарварӣ, ташаббускорӣ ва боло бурдани завқи отифанигорӣ имсол озмуни мазкур ба фестивали гулҳо табдил дода шуд.

Фестивали гулҳо таҳти унвони “Сайри гули лола” аз рӯи   панҷ номинатсия ҷамъбаст гардида, ғолибон бо “Диплом”-и  мақомоти иҷроияи ҳокимияти давлатии шаҳри Душанбе ва мукофотҳои пулӣ сарфароз гардонида шуданд.

Дар поёни чорабинӣ, аз ҷониби Раёсати фарҳанги мақомоти иҷроияи ҳокимияти давлатии шаҳри Душанбе барномаи фарҳангӣ пешниҳоди ҳозирин гардонида шуд.