Фестивали «Сайри гули лола» дар Душанбе       

                                                                

Бо мақсади таъмини амри Президенти Ҷумҳурии Тоҷикистон аз 3 январи соли 2023, №АП-318 ва вусъат бахшидани корҳои ободонӣ, бунёдкорию созандагӣ, ташвиқи ҳисси зебоипарастӣ, табиатдӯстӣ, баланд бардоштани завқи эстетикӣ, фарҳанги экологӣ ва оммавигардонии суннатҳои беҳтарини миллӣ тибқи қарори марбутаи Раиси шаҳри Душанбе фестивали гулҳо таҳти унвони “Сайри гули лола” баргузор мегардад.

Фестивали “Сайри гули лола” дар ду давр: ноҳиявӣ ва шаҳрӣ доир гашта, дар моҳи апрел ҷамъбаст гардида, ғолибон ба комиссияи ҷумҳуриявӣ пешниҳод карда мешаванд.

Фестивал фарогири панҷ номинатсия буда, ғолибон бо “Диплом”-и мақомоти иҷроияи ҳокимияти давлатии шаҳри Душанбе ва мукофотҳои пулӣ сарфароз гардонида мешаванд.

Ёдовар мешавем, ки маскани асосии гули лола дар ҳудуди Тоҷикистон буда, 24 намуди он ҳамчун гули худрӯй вомехӯрад. Дар гузашта байни халқи тоҷик ҳамасола иди сайри гули лола таҷлил гашта, сипас ин намуди гул ба Осиёи хурд, Туркия, Ҳолланд ва дигар мамлакатҳо паҳн шудааст.

Таъкид менамоем, ки бо амри Президенти Ҷумҳурии Тоҷикистон ҳанӯз соли 2018 дар қаламрави ҷумҳурӣ озмуни гулҳо “Сайри гули лола” доир гашта, ҷиҳати эҳёи анъанаҳои миллӣ, ташвиқу тарғиби таҷрибаи пешқадами гулпарварӣ, ташаббускорӣ ва боло бурдани завқи отифанигорӣ ҳамасола баргузор карда мешавад.

Дар доираи амалишавии фестивали “Сайри гули лола” то имрӯз дар ҳудуди гулгашту хиёбон, боғҳои фарҳангу фароғатӣ ва минтақаҳои гуногун ба миқдори 5 млн 700 ҳазору 917 адад гули лола шинонида шудааст, ки сарсабзию шукуфоӣ ва озодагии пойтахтро таъмин мекунад.

Воқеан, шаҳри Душанбе яке аз пештозони корҳои ободонию ниҳолшинонӣ ва гулшинонӣ дар миқёси ҷумҳурӣ маҳсуб ёфта, барандаи комили шоҳҷоизаҳои озмуни “Сайри гули лола” дар солҳои сипаришуда мебошад.

Бо дастур ва роҳнамоиҳои пайвастаи Раиси шаҳри Душанбе корҳои ободонӣ, созандагӣ, ниҳолшинонӣ, гулшинонӣ равнақи бештар касб намуда, таъмини тозагию озодагии шаҳраку маҳаллаҳо, баргузории аксияҳои экологии “Тозагии соҳил” ва “Тозагии маҳал” марбут мебошад.