Аксияи экологии “Тозагии шоҳроҳ” дар Душанбе

                                                                

Бо мақсади таъмини тозагиву озодагии гирду атрофи шаҳроҳҳо ва баҳри иҷрои фармоиши Раиси Кумитаи ҳифзи муҳити зисти назди Ҳукумати Ҷумҳурии Тоҷикистон Сарраёсати ҳифзи муҳити зист дар шаҳри Душанбе дар ин давра 7 маротиба аксияи экологии “Тозагии шоҳроҳ”-ро роҳандозӣ намуд.

Тибқи нақша-чорабиниҳои тасдиқгашта дар ҳамкорӣ бо сохторҳои дахлдори муассисаҳои тандурӯстӣ, донишгоҳҳои олӣ, касбӣ,  хонандагони муассисаҳои таҳсилоти миёнаи умумӣ ва ронандагони нақлиётҳои ҷамъиятӣ дар ҳудуди ноҳияҳои Исмоили Сомонӣ (қисмати шоҳроҳи Душанбе-Хуҷанд), Сино (қисмати шоҳроҳи Душанбе-Турсунзода),  Фирдавсӣ (қисмати шоҳроҳи Душанбе-Бохтар) ва Шоҳмансур (қисмати шоҳроҳи Душанбе-Ваҳдат) аксияҳои экологии “Тозагии шоҳроҳ” ва “Тозагии маҳал” роҳандозӣ гардид.

Дар ҷараёни аксияҳо, ки асосан дар қисматҳои шоҳроҳҳои ба ноҳияҳои шаҳри Душанбе воридшаванда баргузор гардид, донишҷӯёни Донишгоҳи давлатии омӯзгории Тоҷикистон ба номи С.Айнӣ, Донишгоҳи аграрии Тоҷикистон, кормандони нақлиёти ҷамъиятӣ, Раёсати кор бо ҷавонон ва варзиши шаҳри Душанбе  ва волонтёрҳо фаъолона ширкат намуда, дар масофаи 11544 метри тӯлонӣ ҳамшафати шоҳроҳҳо аз партовҳои сахти маишӣ ва зарфҳои пластикӣ тоза гашта, дар ҳаҷми 38 м³ партовҳо ҷамъоварӣ ва ба партовгоҳ бароварда шуд. 

Дар ин зимн, бо иштироки фаъолонаи ронандагони нақлиётҳои ҷамъиятӣ дар минтақаи шоҳроҳи Душанбе-Ваҳдат аксияи “Тозагии маҳал” ҷараён гирифта, дар баробари тоза намудани шафати роҳҳо ҳамчунон дар талу теппаҳои ин мавзеъ ниҳоли дарахтони ороишӣ шинонида шуд.

Сарраёсати ҳифзи муҳити зист дар шаҳри Душанбе дар доираи таҷлили Иди байналмилали Наврӯз тасмим гирифтааст, ки ҷиҳати таъмини тозагии муҳити зист, равнақи корҳои ободонӣ, ниҳолшинонӣ, гулшинонӣ ва иҷрои босифати дастуру супоришҳои роҳбарияти Кумитаи ҳифзи муҳити зисти назди Ҳукумати Ҷумҳурии Тоҷикистон тадбирҳои иловагиро амалӣ намояд.