Маъракаи ниҳолшинонӣ дар шаҳри Бохтар

Дирӯз, бо иштироки роҳбарони мақомотҳои давлатии ҳифзи муҳити зист дар вилояти Хатлон, шаҳри Бохтар ва ҳамчунин, кормандони ташкилоту корхонаҳо, сокинони касбу кори гуногун дар маркази вилояти Хатлон маъракаи ниҳолшинонӣ доир гардид.

Мудири бахши ҳифзи муҳити зисти шаҳри мазкур зимни суҳбат хабар дод, ки тозагиву солимгардонии муҳити атроф, шинонидани ниҳол, гулу буттаҳои ороишӣ, нарм кардани бехи дарахтон, тоза намудани ҷӯю наҳрҳои обгузар ва вусъати дигар иқдомҳои марбут ба беҳдошти ҳифзи муҳити зисти шаҳри Бохтар  аз омодагии сокинон ба баҳор дарак медиҳад.