Семинари миллӣ дар мавзуи “Равандҳо ва тамоюлҳои ҳифзи гуногунии биологӣ дар Ҷумҳурии Тоҷикистон” дар ш.Душанбе баргузор гардид

                                                                

Рузи 21 феврали соли 2023 дар ш. Душанбе бо ташаббуси Кумитаи ҳифзи муҳити зисти назди Ҳукумати Ҷумҳурии Тоҷикистон ва Марказҳои зерсохтори он семинари илмӣ дар мавзуи “Равандҳо ва тамоюлҳои ҳифзи гуногунии биологӣ дар Ҷумҳурии Тоҷикистон” бо иштироки 35 нафар мутахассисон, олимон ва коршиносон аз вазорату идораҳои дахлдори давлатӣ доир карда шуд.

Семинаро бо суханони ифтитоҳӣ директори Маркази миллии амалҳо оид ба ҳифзи муҳити зисти Кумита Шерматов Х. кушода, ноиби Президенти Академияи миллии илмҳои Тоҷикистон Саидов А. доир ба дастовардҳо, афзалиятҳо ва мушкилотҳо дар самти ҳифзу нигоҳдории гуногунии биологӣ дар Ҷумҳурии Тоҷикистон баромад кард.

Аз рӯи барномаи семинар аз рӯи Қонуни Ҷумҳурии Тоҷикистон “Дар бораи захираҳои генетикӣ, Китоби сурхи Ҷумҳурии Тоҷикистон, Барномаи глобалии ҳифзи гуногунии биологии Конвенсияи СММ то соли 2030, Стратегияи миллӣ ва Нақшаи амал оид ба ҳифзу истифодаи оқилонаи гуногунии биологии Ҷумҳурии Тоҷикистон то соли 2030 рӯнамоҳо ва маърузаҳо пешниҳод карда шуданд.

Дар рафти муҳокимаҳо иштирокдорони семинар доир ба ҷанбаҳои ҳифзи гуногунии биологӣ, масъалаҳои бехатарии биологӣ ва ҳифзи намудҳои нодири набототу ҳайвонот пешниҳоду таклифҳо намуданд.

Дар фарҷоми семинар қатънома доир ба масъалаҳои баррасигардида якдилона қабул карда шуд.