Намоиши дастовардҳои Кумита дар Ҷашни Сада                                               

29 январи соли 2023 дар Боғи фарҳангу фароғатии ба номи Абулқосим Фирдавсии шаҳри Душанбе Ҷашни Сада дар сатҳи ҷумҳуриявӣ таҷлил гардид, ки дар он дастовардҳои Кумитаи ҳифзи муҳити зисти назди Ҳукумати Ҷумҳурии Тоҷикистон низ ба маърази тамошо гузошта шуд.

Комисияи ҳукуматӣ бо роҳбарии муовини Сарвазири Ҷумҳурии Тоҷикистон Зиёзода Сулаймон Ризоӣ аз дастовардҳои ба маъраз гузошташуда дидан намуданд.

Сокинон ва меҳмонони дохиливу хориҷӣ аз намоишгоҳи дастовардҳои кишоварзон, маҳсулоти аз ҷиҳати экологӣ тозаи ватанӣ, ҳамчунин ҳунарнамоии санъаткорон, оташафрӯзиҳо ва дигар дастовардҳои ҳунарҳои мардумӣ, ки рамзи хоси  Ҷашни ниёгонамон Сада мебошанд, ҳаловат бурданд.  Дастовардҳои намоишии Кумита ва мақомоти зертобеи он низ, ки аз хаймаҳои ҷангалбонон, сурату мусаввараҳои мамнӯъгоҳҳо, табиати нотакрори диёр, лабораторияи сайёр, варақаҳои тарғиботӣ иборат буд, ба намоиш гузошта шуд, инчунин ҳунармандони театр бо либоси ҷонварони афсонавӣ таваҷҷуҳи сокинону меҳмонон, аз ҷумла кӯдаконро ба худ ҷалб намуданд.