Корҳои фаҳмондадиҳӣ дар доираи иҷрои Барномаи экологӣ                                                              

Дар доираи иҷрои “Барномаи давлатии маҷмӯии рушди тарбия ва маърифати экологии аҳолии шаҳри Душанбе барои солҳои 2021-2025” аз тарафи шуъбаи ҳифзи муҳити зист дар ноҳияи Фирдавсии шаҳри Душанбе дар шаҳракҳои 64 ва 65-и ноҳия гурӯҳи корӣ таъсис ёфта, корҳои фаҳмондадиҳӣ гузаронида шуд.

Дар ҷараёни баргузории вохӯрӣ бо сокинони шаҳрак иттилоъ дода шуд, ки баланд бардоштани маърифат ва тарбияи экологии аҳолӣ, риояи фарҳангӣ, шаҳрнишинӣ ва дар доираи фасли 5-и Қоидаҳои тартиботи ҷамъиятӣ, ободонӣ ва санитарӣ амал кардани сокинон яке аз ҳадафҳои мақомотҳои назоратӣ буда, дар ин росто бояд ҳар шаҳрванд ҷиҳати солимгардонии муҳити зист, равнақи корҳои ободонию созандагӣ, ниҳолшинонӣ ва дар баргузории аксия ва ҳашарҳои экологӣ саҳмгузорӣ намуда, нисбати гулу гиёҳ ва сарватҳои табиии пойтахт нигоҳи хайрхоҳона дошта, дӯстдори асили муҳити зисти хеш бошад.

Масъулин аз сокинони шаҳрак даъват ба амал оварданд, ки дар таъмини тозагии шаҳрак, корҳои ободонию созандагӣ, ниҳолшинонӣ, гулшинонӣ, дар баргузории аксия ва ҳашарҳо саҳмгузорӣ намуда, дар баланд бардоштани маърифати экологии наврасону ҷавонон, бахусус аҳли ҷомеа нақши муҳим гузоранд. Зеро баланд бардоштани маърифати экологӣ аз оила ибтидо гирифта, дар муассисаҳои таълимӣ рушд ва инкишоф дода мешавад.

Сарраёсати ҳифзи муҳити зист дар шаҳри Душанбе тасмим гирифтааст, ки чунин корҳои фаҳмондадиҳиро дар доираи иҷрои Барномаи болозикр дар шаҳраку маҳаллаҳои ноҳияҳои Исмоили Сомонӣ, Сино ва Шоҳмансур роҳандозӣ намояд.