Семинар оид ба татбиқи Барномаи давлатӣ                                               

Дар толори Гимназияи ба номи Асадулло Ғуломови ноҳияи Исмоили Сомонии шаҳри Душанбе бо иқдоми Сарраёсати ҳифзи муҳити зист дар шаҳри Душанбе семинари экологӣ оид ба амалишавии “Барномаи давлатии маҷмӯии рушди тарбия ва маърифати экологии аҳолии Ҷумҳурии Тоҷикистон барои солҳои 2021-2025” доир гардид.

Абдусалим Қурбонов, муовини сардори Сарраёсати ҳифзи муҳити зист дар шаҳри Душанбе зимни суханронӣ зикр намуд, ки дар ҷаласаи нуҳуми Маҷлиси вакилони халқи шаҳри Душанбе иҷрои Барномаи мазкур, ки бо қарори Ҳукумати Ҷумҳурии Тоҷикистон тасдиқ гардидааст мавриди баррасӣ қарор дода шуда, бо инобати амалишавии Барнома дар ин замина қарори дахлдори Маҷлиси вакилони халқи шаҳри Душанбе аз 9 марти соли 2022 қабул гардид.

Бо дастури мақомоти иҷроияи ҳокимияти давлатии шаҳри Душанбе корҳои ободонию созандагӣ ба таври бесобиқа пеш рафта, симои Душанбе тарҳи нав гирифта, фарҳанг ва маърифати экологии сокинон дигаргун ва муносибати онҳо ба корҳои тозагию ободонии маҳалли зист беҳтар гардид. Аз мушоҳидаҳо бармеояд, ки шаҳрвандон бо дарки масъулият нисбат ба масъалаҳои экологӣ таваҷҷӯҳ зоҳир намуда, дар аксия ва ҳашарҳои экологӣ, ки ҳар ҳафта рӯзҳои шанбеву якшанбе доир гардида истодаанд, фаъолона ширкат намуда, як гӯшаи маҳалли зисти худро тозаву озода менамоянд. Дар ин радиф хизмати хонандагони муассисаҳои зертобеи Сарраёсати маорифи шаҳри Душанбе дар таъмини беҳдошти муҳити зист боиси қайд буда, дар аксия ва ҳашарҳои умумишаҳрӣ  иштироки фаъолона менамоянд. Ин худ далели он аст, ки  сокинони пойтахт нисбати ободонии шаҳри азизи худ бепарво набуда, барои ободонии маҳалли зист корҳои назаррасро ба сомон мерасонанд.

Шаҳобов Сайалӣ, директори Гимназияи ба номи Асадулло Ғуломов суханронӣ намуда, қайд намуд, ки вобаста ба амалишавии Барномаи давлатӣ дар муассиса нақша-чорабиниҳо таҳия гашта, дар асоси он пайваста чорабиниҳои экологӣ роҳандозӣ гардида истодааст.

Хушбахт Қодиров, сардори шуъбаи ҳифзи муҳити зист дар ноҳияи Исмоили Сомонӣ зимни баромади хеш иттилоъ дод, ки дар ҳудуди ноҳияи Исмоили Сомонӣ 37 муассисаи мактабию томактабӣ фаъолият менамоянд, ки вобаста ба амалишавии барномаи давлатии экологӣ ҳамкориро бо муассисаҳои таълимӣ хуб ба роҳ мондааст.