Конференсияи байниидоравӣ оид ба татбиқи «Барномаи давлатии маҷмӯии рушди тарбия ва маърифати экологии аҳолии Ҷумҳурии Тоҷикистон барои солҳои 2021-2025»                                  

15 декабри соли 2022 бо иқдоми Кумитаи ҳифзи муҳити зисти назди Ҳукумати Ҷумҳурии Тоҷикистон, бо дастгирии Дафтари Тоҷикистонии Созмони амният ва ҳамкорӣ дар Аврупо дар меҳмонхонаи “Хилтон” дар ш. Душанбе Конференсияи байниидоравӣ оид ба татбиқи «Барномаи давлатии маҷмӯии рушди тарбия ва маърифати экологии аҳолии Ҷумҳурии Тоҷикистон барои солҳои 2021-2025» баргузор гардид. Дар чорабинии мазкур роҳбарият ва масъулони сохторҳои Кумита, инчунин намояндагони вазорату идораҳои масъули иҷро, марказҳои орхус дар шаҳрҳои Хоруғ, Бохтар, Душанбе, шаҳраки Ғарми ноҳияи Рашт ва ташкилотҳои ҷамъиятӣ иштирок намуданд.

Ҷаласаро бо сухани муқаддимавӣ муовини якуми раиси Кумитаи ҳифзи муҳити зисти назди Ҳукумати Ҷумҳурии Тоҷикистон Қиёмзода Зарафо Суфиҷон ҳусни оғоз бахшида, таваҷҷуҳи давлату Ҳукумати Ҷумҳурии Тоҷикистон, ба хусус Пешвои муаззами миллат, Президенти Ҷумҳурии Тоҷикистон муҳтарам Эмомалӣ Раҳмон оид ба ҳифзи муҳити зист, истифодаи оқилонаи захираҳои табиат, аз ҷумла пешниҳодҳои ҷаҳонӣ оид ба обу экология ва тағйирёбии иқлим баён гашт. Ҳамзамон бо сухани ифтитоҳи иҷрокунандаи вазифаи Сардори департаменти иқтисодию экологии Дафтари барномаҳои Созмони амният ва ҳамкорӣ дар Душанбе ҷаноби Кай Вегерих шунида шуд. 

Аз тарафи мушовири миллӣ оид ба масъалаҳои ҳифзи муҳити зисти Дафтари барномаҳои Созмони амният ва ҳамкорӣ дар Душанбе Муҳаббат Камарова низ оид ба ҳадафҳои ташкилоти мазкур ва ҳамкориҳо дар самтҳои мухталифи муҳити зист сухан намуданд. Таъкид карда шуд, саҳми Дафтари барномаҳои Созмони амният ва ҳамкорӣ дар Аврупо дар Душанбе дар татбиқи «Барномаи давлатии маҷмӯии рушди тарбия ва маърифати экологии аҳолии Ҷумҳурии Тоҷикистон барои солҳои 2021-2025» низ назаррас буда, бо Кумитаи ҳифзи муҳити зист дар ин самт ҳамкориҳои судманд ба роҳ монда шудаанд.

Сипас, сардори Маркази ахбори экологӣ, тарғибот ва барномасозии компютерии Кумитаи ҳифзи муҳити зист Тиллоӣ Г. оид ба ҷараёни иҷрои босифат ва саривақтии бандҳои Нақша чорабиниҳо оид ба амалигардонии “Барномаи давлатии маҷмӯии рушди тарбия ва маърифати экологии аҳолии Ҷумҳурии Тоҷикистон барои солҳои 2021-2025” ва сардори Маркази Орхус Ёқубов Ҷамолиддин оид ба фаъолияти марказҳои мазкур баҳри чорабиниҳои дар самти маърифатбахшӣ ва иттилоърасонии экологии аҳолӣ аз ҷониби марказҳои номбурда ба  тариқи рӯйнамо муфассал баромадҳо намуданд.   

Инчунин, баромади намояндаи Кумитаи телевизион ва радиои назди Ҳукумати Ҷумҳурии Тоҷикистон дар мавзуи “Нақши васоити ахбори омма дар тарғиби донишҳои экологӣ, тарбияи тафаккури зеҳнии ҷомеа оид ба масъалаҳои марбут ба ҳифзи муҳити зист, инъикоси мушкилоти экологӣ дар ҷумҳурӣ, аз ҷумла ҳифз намудани қабати ҳосилхези замин, пешгирии сӯзонидани пояҳои зиротҳои кишоварзӣ ва пешниҳодҳо дар ин хусус” пешниҳоди иштирокдорони чорабинӣ гашт.

Дар охир вобаста ба масъалаҳои мазкур иштирокдорон ба таври саволу ҷавоб ва ҳосил намудани ҳусни тафоҳум барои иҷрои саривақтӣ ва босифати бандҳои Нақшаи чорабиниҳои Барномаи мазкур маълумоти фаровон бардошт намуданд.