Ҷамъбасти иштироки ҳайати Ҷумҳурии Тоҷикистон дар ҳошияи Конфронси 27-уми тарафҳои Конвенсияи қолабии Созмони Милали Муттаҳид оид ба тағйирёбии иқлим дар Шарм-уш-Шайх (7-18 ноябр)              

Аз 7 то 18 ноябри соли ҷорӣ дар шаҳри Шарм-уш-Шайхи Ҷумҳурии Мисри Араб Конфронси 27-уми тарафҳои Конвенсияи қолабии Созмони Милали Муттаҳид оид ба тағйирёбии иқлим баргузор гардид.

Бояд тазаккур дод, ки дар Конфронси 27-уми тарафҳои Конвенсияи қолабии Созмони Милали Муттаҳид оид ба тағйирёбии иқлим беш аз 35 ҳазор нафар, бо иштироки тақрибан 100 сарони давлату ҳукуматҳои кишварҳои ҷаҳон ширкат варзиданд.

Ҳайати Ҷумҳурии Тоҷикистонро дар Конфронси мазкур Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон роҳбарӣ намуданд.

7 ноябри соли ҷорӣ Пешвои миллат муҳтарам Эмомалӣ Раҳмон дар доираи Конфронси 27-уми тарафҳои Конвенсияи қолабии Созмони Милали Муттаҳид оид ба тағйирёбии иқлим маросими ифтитоҳи Павилиони Ҷумҳурии Тоҷикистонро баргузор намуданд.

Боиси хушнудист, ки дар ҳошияи Конфронси тарафҳо дар давраи соҳибистиқлолии ҷумҳурӣ бори аввал Павилиони Ҷумҳурии Тоҷикистон аз ҷониби Кумитаи ҳифзи муҳити зисти назди Ҳукумати Ҷумҳурии Тоҷикистон дар ҳамкорӣ бо Барномаи Рушди Созмони Милали Муттаҳид ва дигар шарикони рушд ташкил гардид.

Муҳтарам Эмомалӣ Раҳмон дар суханронии хеш дар нишасти сатҳи баланди Конвенсияи мазкур масъалаи ҷалби таваҷҷӯҳи ҷомеаи ҷаҳонӣ ба осебпазирии баланди ҷумҳурӣ ба паёмадҳои тағйирёбии иқлим ва ҷалби бештари сармоягузорӣ барои мутобиқ гардонидани соҳаҳои калидии иқтисодиёти кишвар ба тағйирёбии иқлим, инчунин эълон намудани соли 2025 «Соли байналмилалии ҳифзи пиряхҳо» ва таъсиси «Фонди байналмилалии ҳифзи пиряхҳо»-ро матраҳ намуданд.

Бояд тазаккур дод, ки дар ҳошияи чорабинии мазкур аз ҷониби Кумитаи ҳифзи муҳити зисти назди Ҳукумати Ҷумҳурии Тоҷикистон дар Павилиони Ҷумҳурии Тоҷикистон зиёда аз 20 чорабиниҳои канорӣ оид ба мавзӯъҳои афзалиятноки миллӣ ва мавзӯъҳои марбут ба конфронс дар ҳамкорӣ бо Вазорати энергетика ва захираҳои оби Ҷумҳурии Тоҷикистон, Барномаи рушди Созмони Милали Муттаҳид, инчунин Созмони озуқаворӣ ва кишоварзии Созмони Милали Муттаҳид, Агентии ИМА оид ба рушди байналмилалӣ, Агентии Оғохон “Ҳабитат”, Ҷамъияти ҳамкориҳои байналмилалии Олмон, Созмони Байналмилалии Муҳоҷират, Вазорати муҳити зисти Ҷумҳурии Арманистон, Фонди байналмилалии наҷоти Арал, Гурӯҳи кишварҳои тараққикунандаи маҳсур дар хушкӣ, Маркази минтақавии экологии Осиёи Марказӣ ва Созмони умумиҷаҳонии метеорологӣ баргузор гардид.

Инчунин дар Павилиони Ҷумҳурии Тоҷикистон шароит барои вохӯриҳои дутарафаи намояндагони Ҷумҳурии Қазоқистон ва дигар кишварҳо фароҳам оварда шуд.

Бояд қайд намуд, ки дар доираи Конфронси 27-уми тарафҳо Раиси Кумитаи ҳифзи муҳити зисти назди Ҳукумати Ҷумҳурии Тоҷикистон Шерализода Баҳодур Аҳмадҷон мулоқотҳои дуҷониба бо Штеффи Лемке, вазири федеролии Олмон оид ба муҳити зист, ҳифзи табиат, амнияти ҳастаӣ ва ҳифзи истеъмолкунандагон, Ҷон Керрӣ, фиристодаи махсуси Президенти Иёлоти Муттаҳидаи Америка оид ба тағйирёбии иқлим, Руслан Эделгериев, мушовири Президенти Федератсияи Русия, намояндаи махсуси Президенти Федератсияи Русия оид ба тағйирёбии иқлим, Карлос Мануэл Родригес, директори генералӣ ва раиси Фонди глобалии экологӣ, Франк Райсберман, директори Институти ҷаҳонии рушди сабз, Навоб Алӣ Хон, директори Агентии Оғохон “Ҳабитат”, Самеҳ Ваҳба, директори минтақавии рушди устувори Аврупо ва Осиёи Марказии Бонки Ҷаҳонӣ, Ясмин Сиддиқӣ, директори муҳити зист, кишоварзӣ ва захираҳои табии Шуъбаи Осиёи Марказӣ ва Ғарбии Бонки Осиёгии Рушд, Дина Солеҳ, директори Шуъбаи Шарқи наздик, Африқои Шимолӣ ва Аврупои Фонди Байналмилалии Рушди кишоварзӣ ва Эстефания Ардиля, директор оид ба равобит бо кишварҳои Шарикии Саҳми дар сатҳи миллӣ муайяншуда баргузор намуда, масъалаҳои тақвияти ҳамкорӣ дар самти таҳияи лоиҳаҳои нав, дастрасӣ ба грантҳо ва лоиҳаҳои сармоягузорӣ баррасӣ гардиданд.

Дар хотима бояд зикр намуд, ки Кумитаи ҳифзи муҳити зисти назди Ҳукумати Ҷумҳурии Тоҷикистон дар ҳамкорӣ бо Барномаи рушди Созмони Милали Муттаҳид баргузории чорабинӣ оид ба натиҷаҳои бадастовардаро дар ҳошияи Конфронси 27-уми тарафҳои Конвенсияи қолабии Созмони Милали Муттаҳид оид ба тағйирёбии иқлим дар Шарм-уш-Шайхи Ҷумҳурии Мисри Араб дар ҳамкорӣ бо Барномаи Рушди Созмони Милали Муттаҳид ба нақша гирифтааст.