Ошкор намудани сайди ғайриқонунии моҳӣ                 

Ҳангоми аз ҷониби нозирони Сарраёсати ҳифзи муҳити зист дар вилояти Суғд гузаронидани санҷиши фаъолияти моҳидории ҶСК «Таъминоти моҳӣ»-и шаҳри Гулистон муайян гардид, ки моҳидори ҷамъияти мазкур Мамадҷонов Мурод, сокини ҷамоати деҳоти Маҳрами шаҳри Конибодом, сайди моҳиро бо тӯрҳои майдаи ба талабот номувофиқ гузаронида, дар натиҷа 244 сар моҳии ғайриченак сайд кардааст. Нисбати моҳидор Мамадҷонов М. маводи зарурӣ, аз ҷумла ҳисоби маблағи ба табиат расонидашуда, хулосаи ихтиологӣ ва дигар ҳуҷҷатҳо тартиб дода шуда, тибқи талаботи қонунҳои амалкунанда барои чораандешӣ ба Суди шаҳри Конибодом ирсол мегардад.

Ҳамзамон, ҳангоми гузаронидани амалиёти фаврии шабонарӯзии назоратӣ дар обанбори Баҳри Тоҷик ва атрофи он, дар минтақаи Маҳрам ҳодисаи харидуфурӯши 965 сар моҳии навсайдшуда ошкор гардид, ки ғайри талаботи ҷорӣ сайд карда шудааст.

Бо амали мазкур сокини ҷамоати деҳоти Кучкаки шаҳри Конибодом Ҳусейнова М.М. машғул буд, ки нисбати ӯ тибқи талаботи қонунҳои амалкунанда маводи зарурӣ тартиб дода, ба мақомоти дахлдор ҷиҳати чораандешӣ пешниҳод карда мешавад.