Корҳои фаҳмондадиҳӣ оид ба масъалаи муомилот бо партовҳо дар масҷиди ҷомеи шаҳри Ваҳдат                    

18 ноябри соли ҷорӣ дар масҷиди ҷомеи шаҳри Ваҳдат бо мақсади иҷрои талаботи Барномаи давлатии маҷмӯии рушди тарбия ва маърифати экологии аҳолии Ҷумҳурии Тоҷикистон барои солҳои 2021-2025 кормандони шуъбаи ҳифзи муҳити зист дар ш. Ваҳдат бо намозгузорон вохӯрӣ баргузор намуданд.

Пеш аз оғози намози ҷумъа аз ҷониби кормандони шуъбаи ҳифзи муҳити зисти ш. Ваҳдат ба намозгузорон оид ба риояи қоидаю меъёрҳои экологӣ маълумот пешниҳод гардида, хатиби масҷид аз ҳозирин даъват ба амал овард, ки истифодаи халтаҳои яккаратаи полиэтилениро ба хотири тоза нигоҳ доштани муҳити зист ва таъмини саломатии аҳолӣ коҳиш диҳанд.

Баъд аз анҷоми намози ҷумъа аз тарафи сармутахассиси шуъба Саидурфони Қутбиддин ба намозгузорон ба хотири баланд бардоштани сатҳи огоҳии аҳолӣ оид ба зарари халтаҳои яккаратаи полиэтилениву маводди пластикӣ варақаҳои иттилоотӣ, ки аз ҷониби Маркази Орхуси Кумита, Ташкилоти ҷамъиятии “Илмхона” ва бо дастгирии Дафтари ҳамкории Швейтсария дар Тоҷикистон таҳия гардида буд, тақдим карда шуд.