ВОХӮРИИ МУОВИНИ РАИСИ КУМИТА БО ДИРЕКТОРИ ДАФТАРИ ҲАМКОРИИ ШВЕЙТСАРИЯ ДАР ТОҶИКИСТОН               

Санаи 15 ноябр дар маҷлисгоҳи Кумита вохӯрии муовини раиси Кумитаи ҳифзи муҳити зист Мавлодод Абдулқодирхон бо директори Дафтари ҳамкории Швейтсария дар Тоҷикистон хонум Саломе Штайб баргузор гардид. Зимни суханронӣ ҷонибҳо доир ба муҳимияти коҳиш додани истифодаи халтаҳои полиэтиленӣ ва пластикӣ ибрози назар намуда, ба маъракаи иттилоотӣ ҷиҳати баланд бардоштани огоҳӣ оид ба зарари маводҳои пластикӣ ҳусни оғоз бахшиданд.

Ёдовар бояд шуд, ки дар чаҳорчӯбаи амалишавии маъракаи иттилоотӣ, ки то охири моҳи ноябри соли равон дар назар дошта шудааст, Маркази Орхуси Кумитаи ҳифзи муҳити зист (КВД илмию истеҳсолии “Табиат”) дар ҳамкорӣ бо ташкилотҳои ҷамъиятии “Илмхона”, “Маркази экологии ҷавонон” баргузории якчанд аксияҳоро бо унвони “Ба пластика Не бигӯ!” дар фурӯшгоҳҳои бузурги пойтахт, аз ҷумла “Ашан”, “Сиёма” ва “Пайкар” ба нақша гирифтааст. 

Қобили зикр аст, ки намояндагони воситаҳои ахбори оммаи кишвар барои инъикоси муаммоҳои вобаста ба маводҳои пластикӣ дар маъракаи иттилоотӣ фаъолона иштирок хоҳанд кард.