Табрикоти раиси Кумитаи ҳифзи муҳити зисти назди Ҳукумати Ҷумҳурии Тоҷикистон Шерализода Баҳодур Аҳмадҷон бахшида ба 30-солагии Иҷлосияи 16-уми Шўрои Олии Ҷумҳурии Тоҷикистон ва Рӯзи Президенти Ҷумҳурии Тоҷикистон             

Имрӯзҳо ҳар як сокини кишвари азизамонро таассуроти нек аз истиқболи           30-юмин солгарди Иҷлосияи таърихии 16-уми Шӯрои Олии Ҷумҳурии Тоҷикистон ва Рӯзи Президенти Ҷумҳурии Тоҷикистон фаро гирифтааст. Ба ин муносибат тамоми кормандони Кумита ва мақомоти зертобеи онро ба ифтихори ин санаи тақдирсози давлатиамон сидқан табрику таҳният намуда, пеш аз ҳама барои ҳар як хонадони Шумо, тамоми мардуми кишвари маҳбубамон тинҷию осоиштагиро таманно дорам.

Си сол аст, ки Тоҷикистони соҷибистиқлоли мо бо сарбаландию шарофатмандӣ ба сӯи ояндаи дурахшон қадамҳои устувор мегузорад. Маҳз Истиқлолиятро метавон манбаи ҳамаи падидаҳои дурахшони миллати тоҷик арзёбӣ кард, зеро он дар ниҳоди худ ҳадафҳои олии миллӣ, таърихӣ ва инсонии мардумро асолат бахшид, ки тамоми дастовардҳои кишварамон аз он сарчашма мегирад.

Иҷлосияи 16-уми Шӯрои Олии Ҷумҳурии Тоҷикистон дар саҳифаҳои таърихи навини халқи тоҷик ҳамчун рамзи иҷлосияи наҷотбахшу сарнавиштсоз ворид гардидааст. Иҷлосияи мазкур ба фарзанди барӯманди халқи тоҷик муҳтарам Эмомалӣ Раҳмон ваколати роҳбарӣ ба ҷомеаи Тоҷикистонро дод, ҳамзамон ба души ӯ вазифаи мураккаб, вале муқаддаси бунёди давлати соҳибистиқлол ва демократиро вогузор намуд. Муҳтарам Эмомалӣ Раҳмон ба сифати сармеъморе интихоб гардиданд, ки мебоист на фақат иморати аз ҷанг   вайроншудаи давлати тоҷиконро тармим кунад, балки сохтмони онро бар пояҳои устувору қавии сифатан нав барпо намояд. Дар Иҷлосияи 16-уми Шӯрои Олии Ҷумҳурии Тоҷикистон Раиси тозаинтихоби кишвар мақсад ва ҳадафи асосии худро баён карда буданд. Аз нахустин лаҳзаҳои ба ин вазифаи душвор таъйин гаштан маълум буд, ки азму иродаи он кас дар роҳи барпо кардани давлати демократии ҳуқуқбунёд қатъист.

Рӯзи Президент ҳам рӯзи қадршиносӣ ба заҳматҳои бисёрсолаи Ҷаноби Олӣ муҳтарам Эмомалӣ Раҳмон мебошад. Президенти Ҷумҳурии Тоҷикистон барҳақ Пешвои миллат дар асри 21 буда, ҳар як кору пайкорҳои ҷоннисоронаи он кас барои мардуми тоҷик дар таҳкими сулҳу субот ва устувории давлатдорӣ, худшиносӣ ва ҳувияти миллӣ, вусъати корҳои созандагию бунёдкорӣ намунаи ибрат ва пайравист.

Бори дигар ин санаҳои тақдирсози миллат- 30-солагии баргузор гаштани Иҷлосияи таърихии 16-уми Шӯрои Олии Ҷумҳурии Тоҷикистон ва Рӯзи Президенти Ҷумҳурии Тоҷикистонро ба   Шумо табрик гуфта, таманнои онро дорам, ки мардуми сарбаланди Ватани азизро тамоми орзуву омол ва зиндагии шоиста насиб гардад.

Саломату сарбаланд бошед, ҳамкорони азиз.