Вохӯрии раиси Кумита Шерализода Баҳодур бо хонум Дина Салеҳ дар доираи Конфронси 27-уми тарафҳо оид ба тағйирёбии иқлим               

Дар доираи Конфронси 27-уми тарафҳо оид ба тағйирёбии иқлим дар шаҳри Шарм ул Шейхи Ҷумҳурии Мисри Араб раиси Кумитаи ҳифзи муҳити зисти назди Ҳукумати Ҷумҳурии Тоҷикистон Баҳодур Шерализода бо директори минтақавӣ барои давлатҳои Шарқи наздик, Африкаи шимолӣ ва Аврупои Фонди Байналмилалии Рушди Кишоварзӣ хонум Дина Салеҳ дар павилиони Ҷумҳурии Тоҷикистон мулоқот намуд.

Баҳодур Шерализода ба хонум Дина Салеҳ оид ба ҳамкориҳои дуҷониба дар самти таҳияи лоиҳаҳо доир ба масъалаҳои мутобиқшавӣ ба тағйирёбии иқлим изҳори қанатмандӣ намуда, аз ҷумла қайд гардид, ки аз ҷониби Фонди мазкур ва Кумита дар давоми соли 2021 - 2022 лоиҳаи нави давлатии сармоягузорӣ бо ҷалби маблағгузории Фонди байналмилалии рушди кишоварзӣ, Фонди иқлими сабз ва Фонди глобалии экологӣ дар самти дастгирии соҳаи кишоварзӣ бо назардошти масъалаҳои мутобиқшавӣ ба тағйирёбии иқлим, ҳифзи гуногунии биологӣ ва беҳтаркунии хизматрасонии обуҳавошиносӣ таҳия ва тасдиқ гардид.    

Хонум Дина Салеҳ доир ба раванди ҳамкориҳои Фонди мазкур бо Кумита низ изҳори қаноатмандӣ намуда, қайд кард, ки бо мақсади таҳия намудани дизайни лоиҳаи нави иловагӣ дар самти барқарорсозии ландшафт, ҳифзи гуногунии биологӣ аз 21 то 26 ноябри соли ҷорӣ коршиноси байналхалқӣ ба Тоҷикистон сафарбар карда мешавад.

Инчунин, Дина Салеҳ доир ба ташаббуси Фонд оид ба таҳияи лоиҳаи нави минтақавӣ барои Ҷумҳурии Тоҷикистон ва Ӯзбекистон дар самти мутобиқшавӣ ба тағйирёбии иқлим қайд карданд ва ин ташаббус аз ҷониби раиси Кумита дастгирӣ ёфт.

Барои аз ҷониби Тоҷикистон таҳия ва қабул гардидани Саҳми дар сатҳи миллӣ муайянгардида оид ба коҳиш додани ихроҷи газҳои гулхонагӣ раиси Кумита қайд карда, Фонди байналмилалии рушди кишоварзиро барои дастгирии татбиқи ҳуҷҷати мазкур даъват намуданд.

Дар охир раиси Кумита Дина Салеҳро барои боздид намудан аз Ҷумҳурии Тоҷикистон дар вақти ба онҳо муносиб даъват намудан ва ин даъват аз ҷониби Дина Салеҳ қабул гардид.