Вазъи барориши партов дар ноҳияи Шоҳмансур                                                                             

Бо мақсади иҷрои қарори Раиси шаҳри Душанбе “Дар бораи тасдиқи тартиби ҷамъоварӣ, баровардан, коркард ва безарар гардонидани партовҳои сахти маишӣ дар ҳудуди марзию маъмурии шаҳри Душанбе” ва бо инобати амалишавии қонунҳои амалкунанда дар самти ҳифзи муҳити зист сардори Сарраёсати ҳифзи муҳити зист дар шаҳри Душанбе Раҳмонов Л., аз вазъи барориши партовҳо ва фаъолияти КВД партовкашони ноҳияи Шоҳмансури шаҳри Душанбе дидан намуд.

Маълум гардид, ки КВД “Нақлиёти махсуси партовҳои сахти маишӣ”-и ноҳияи Шоҳмансур фаъолияти худро дар асоси оиннома ба роҳ монда, барои сари вақт баровардани партов аз нуқтаҳои партовҷамъкунии ноҳияи Шоҳмансур масъул мебошад. Дар асоси ахбороти мавҷуда, дар ҳудуди ноҳия 360 нуқтаи махсуси партовҷамъкунӣ мавҷуд мебошад, ки аз ин 75 адад дар шаҳракҳо, 94 адад дар маҳаллаҳо, 156 адад дар ташкилоту корхонаҳо ва 35 адад дар шахтаҳо яъне дар биноҳои баландошёна мебошад.

Ҳар рӯз аз ҳудуди ноҳия ба миқдори 180 то 200 тонна партовҳо ба партовгоҳи шаҳрӣ бароварда мешавад.

Дар ҷараёни боздид, аз парки техникии корхонаи партовкашон, нуқтаҳои партовҷамъкунӣ, шахтаҳои биноҳои баландошёна, сардори Сарраёсати ҳифзи муҳити зист дар шаҳри Душанбе ба масъулон дастур дод, ки дар кутоҳтарин муддат нуқтаҳои партовҷамъкуниро ба тартиб дароварда, қуттиҳои партов рангубор ва рақам гузошта шуда, дар ҳар як нуқта овезаҳо насб карда шавад.

Гузашта аз ин, таъкид карда шуд, ки барои сари вақт баровардани партовҳо аз нуқтаҳои партовҷамъкунӣ, тозагии гирду атрофи партовгоҳҳо, таъмини ободонию сарсабзии ҳудуди шаҳраку маҳаллаҳо тадбирҳо андешида шуда, ҷиҳати баланд гардидани маърифати экологии аҳолӣ корҳои фаҳмондадиҳӣ роҳандозӣ карда шавад.