Сафари гурӯҳи экожурналистон ба мамнӯъгоҳи давлатии табиии "Дашти Ҷум"                                                                

Бо иқдоми Кумитаи ҳифзи муҳити зисти назди Ҳукумати Ҷумҳурии Тоҷикистон дар доираи татбиқи "Барномаи давлатии маҷмӯии рушди тарбия ва маърифати экологии аҳолии Ҷумҳурии Тоҷикистон барои солҳои 2021-2025" рӯзҳои 5-6 августи соли 2022 сафари гурӯҳи беш аз 25 нафараи экожурналистон ба мамнӯъгоҳи давлатии табиии "Дашти Ҷум" дар мавзеи ноҳияи Шамсиддин Шоҳини вилояти Хатлон сурат гирифт.

Мақсад аз ташкили чунин экотурҳо омӯзиш ва шиносонидани намояндагони воситаҳои ахбори омма, ки аъзои маҳфили экологии Кумита ҳастанд, ба ҳудудҳои табиии муҳофизатшаванда, мамнӯъгоҳҳо ва дигар мавзеъҳои дорои аҳамияти экологидошта, аз наздик дидани олами набототу ҳайвоноти нодир ва пешниҳоди маълумоти саҳҳеу муътамад ба аҳолӣ мебошад.

Дар рафти сафар ба аъзои клуб имконият даст дод, ки мавзеи мазкурро аз наздик бубинанд, ба мутахассисони соҳавӣ дар иртибот бошанд ва таассуроти худро дар бораи сафарашон тариқи воситаҳои ахбори омма ба аҳолӣ расонанд. Аз тарафи дигар аъзоёни маҳфили экологӣ, аз фаъолияти кормандони мамнӯъгоҳи мазкур, ҷойҳои гаштугузори ҳайвоноти нодир, аз ҷумла бузи кӯҳии пармашох ё морхӯр шиносоӣ пайдо намуданд.

Барои ҳамин, хабарнигори аъзои маҳфили экологӣ аввалан бо мутахассисони соҳавӣ аз чанд мавзеъҳои хушманзари мамнӯъгоҳ, аз ҷумла шароити саҳроии кормандони мамнӯъгоҳи давлатии табиии "Дашти Ҷум" дидан намуда, сипас баъди бозгашт дар саҳни хушбодуҳавои идораи маъмурии мамнӯъгоҳ дар Ҷамоати деҳоти Саричашмаи ноҳияи Шамсиддин Шоҳин масъулини дахлдори зерсохтори Кумита ба онҳо семинари навбатии бозомузиро гузарониданд.

Дар оғози семинар роҳбарият ва дигар кормандони масъули мамнӯъгоҳи мазкур дар бораи ташкилшавӣ, масоҳат, олами набототу ҳайвоноти нодири мамнӯъгоҳ ба таври муфассал маълумот доданд. Ҳамзамон, дар семинари мазкур кормандони самти марбута аз Дастгоҳи марказии Кумита ва муовини директори МД "Ҳудудҳои табиии махсус муҳофизатшаванда"-и Кумита Саидов Нуралӣ иштирок ва бо аъзои маҳфил дар робита ба мавзуъ маълумотҳои муътамад ва мушаххас пешниҳод намуданд.

Қисми дигари семинари омӯзишӣ иборат аз саволу ҷавобҳо буд, ки аз ҷониби масъулони соҳавӣ ба саволҳои сершумори аъзоёни маҳфил ҷавобҳои мушаххас дода шуд.

Баргузории чунин маҳфилҳои экологӣ аз ҷониби Кумитаи ҳифзи муҳити зист моҳе як маротиба гузаронида шуда, масъулони сохторҳои соҳаи ҳифзи муҳити зист оид ба самтҳои марбутаи соҳавӣ маълумоти дахлдор пешниҳод менамоянд. Ин иқдом барои баланд бардоштани сатҳи огоҳонии хабарнигорон, ки тариқи воситаҳои садою симо, матбуот ва шабакаҳои интернетӣ мавод оид ба самтҳои ҳифзи муҳити зистро нашр менамоянд, мусоидат менамояд.