Баргузории аксияи "Тозагии маҳал" дар ноҳияи Вахш                                                                 

Дар ноҳияи Вахш бо ташаббуси бахши ҳифзи муҳити зист, дар марказ ва ҷамоатҳои шаҳраку деҳот ҷиҳати иҷрои нақша-чорабниҳои Кумитаи ҳифзи муҳити зисти назди Ҳукумати Ҷумҳурии Тоҷикистон, Сарраёсати ҳифзи муҳити зист дар вилояти Хатлон бахшида ба ҷашни 31-солагии Истиқлоли давлатии кишвар аксияи экологии "Тозагии маҳал" гузаронида шуд, ки дар он сокинон, кормандони касбу кори гуногун ва дигар фаъолони ҷомеаи шаҳрванди ширкат намуданд.

Аз рӯи тартиб иштироккунандагони ин чорабинии оммавӣ ба тоза кардани шафати роҳ, ҷӯйборҳои обгузар, назди ташкилоту муассисаҳо ва дигар маконҳои ҷамъиятӣ машғул гардида, ҳиссаи арзандаи худро дар беҳдошти муҳити зист гузоштанд.

Мудири бахши ҳифзи муҳити зисти ноҳияи Вахш Манучеҳр Маҳмадзода дар зимни суҳбат хабар дод, ки мақсад аз роҳандозӣ намудани аксияи "Тозагии маҳал" дар тақвияти маърифати экологии сокинон, тарбия намудани насли наврас дар рӯҳияи табиатдустӣ, тоза нигоҳ доштани муҳити атроф ва амалишавии нақша-чорабиниҳои марбут ба Барномаи давлатии комплексии рушди тарбия ва маърифати экологии аҳолии ноҳия мебошад.