Баргузории аксияи “Тозагии соҳил” дар шаҳри Ҳисор                                                                     

Ҷиҳати иҷрои фармоиши раиси Кумитаи ҳифзи муҳити зисти назди Ҳукумати Ҷумҳурии Тоҷикистон, дар доираи нақшаи чорабиниҳои худ шуъбаи ҳифзи муҳити зист дар шаҳри Ҳисор бо мақсади сазовор пешвоз гирифтани ҷашнҳои миллию давлатӣ, ба ин васила тозаю озода нигоҳ доштани кӯчаю паскӯчаҳо ва ҷалби шаҳрвандон дар беҳтар намудани вазъи экологӣ вобаста ба баргузор намудани аксияҳои экологӣ корҳои зиёдеро ба анҷом расонида истодааст.

Аз ҷумла санаи 23 июли соли ҷорӣ бо иштироки беш аз 200 нафар кормандони касбу кори гуногун, сокинони ҷамоатҳо ва хонандагони муассисаҳои таҳсилоти миёнаи умумӣ дар ҳудуди ноҳияи мазкур аксияи «Тозагии соҳил» баргузор гардид. Дар рафти баргузории ин аксия аз ҷониби иштирокчиён соҳили канали “Ҳисор” аз партовҳои гуногун тоза гардида, бо истифодаи ду адад техникаҳои боркашон 3,2 м³ партовҳои ҷамъшуда ба партовгоҳи расмии шаҳр интиқол дода шуданд.

Дар рафти аксияи мазкур сардори Раёсати назорати давлатии истифода ва ҳифзи захираҳои оби Кумита Судуров С., иштирок намуд.

Сардори шуъбаи ҳифзи муҳити зист дар шаҳри Ҳисор Файззода Б. зимни суҳбат гуфт: чунин шанбегиҳои дастаҷамъона ва аксияҳои экологӣ ҳар ҳафта дар ҳудуди шаҳр ва ҷамоатҳо бо ҷалби кормандони ташкилоту корхонаҳо гузаронида мешаванд. Инчунин, ӯ афзуд, мутахассисони шуъба бо аҳолӣ дар хусуси тозагии ҳудуди шаҳр, муомилот бо партовҳо, кабудизоркунию солимгардонии муҳити зист корҳои таблиғотию ташвиқотиро дар сатҳи лозимӣ ба роҳ мондаанд.