Барномаи давлатӣ дар амал               

Дар толори мақомоти иҷроияи ҳокимияти давлатии ноҳияи Исмоили Сомонии шаҳри Душанбе вобаста ба иҷрои қарори Ҳукумати Ҷумҳурии Тоҷикистон “Дар бораи Барномаи давлатии маҷмӯии рушди тарбия ва маърифати экологии аҳолии Ҷумҳурии Тоҷикистон барои солҳои 2021-2025” вохӯрии сохторҳои марбутаи мақомот ва намояндагони Маҷлиси вакилони халқи шаҳри Душанбе доир гардид.

Абдусалим Қурбонов, муовини сардори Сарраёсати ҳифзи муҳити зист дар шаҳри Душанбе суханронӣ намуда, афзуд, ки оид ба иҷрои “Барномаи давлатии маҷмӯии рушди тарбия ва маърифати экологии аҳолии шаҳри Душанбе барои солҳои 2021-2025” нозирони шуъбаҳои ҳифзи муҳити зисти ноҳияҳои шаҳри Душанбе бо сокинони шаҳраку маҳаллаҳо, шаҳракҳо ва дар 37 муассисаҳои мактабию томактабии ноҳияи Шоҳмансур сӯҳбату вохӯриҳо роҳандозӣ намуданд.

Бо мақсади татбиқи барномаи болозикр қарори Маҷлиси вакилони халқи шаҳри Душанбе “Дар бораи рафти иҷрои “Барномаи давлатии маҷмӯии рушди тарбия ва маърифати экологии аҳолии Ҷумҳурии Тоҷикистон барои солҳои 2021-2025” дар шаҳри Душанбе ва нақшаи чорабиниҳо оид ба ниҳолшинонию сабзкорӣ, шинонидани гулҳои садбарг дар мавсими тирамоҳи соли 2021 ва баҳори соли 2022” аз 09 марти соли 2022, №88 қабул гардид.

Вакилони Маҷлиси вакилони халқи шаҳри Душанбе ва намояндагони мақомоти иҷроияи ҳокимияти давлатии ноҳияи Исмоили Сомонӣ зимни суханронӣ таъкид намуданд, ки бо мақсади боз ҳам беҳтар намудани ҳолати экологӣ, равнақи корҳои ободонию сабзкорӣ, гулшинонӣ ва боло бурдани маърифати экологӣ минбаъд низ тибқи нақшаҳои тасдиқшуда тадбирҳои мушаххас андешида шуда, иҷрои қарорҳои дар ин самт қабулгардидаро таъмин карда шавад.