Нишасти матбуотӣ оид ба фаъолияти Кумита дар нимсолаи якуми соли 2022                                                     

Мутобиқи супориши Дастгоҳи иҷроияи Президенти Ҷумҳурии Тоҷикистон аз 28 июни соли 2022, №26/10-272, санаи 13 июли соли ҷорӣ дар дастгоҳи марказии Кумитаи ҳифзи муҳити зисти назди Ҳукумати Ҷумҳурии Тоҷикистон бо иштироки доираи васеи хабарнигорон оид ба фаъолияти Кумита ва зерсохтори он дар нимсолаи якуми соли 2022 нишасти матбуотӣ баргузор гардид.

Дар нишасти матботии Кумита намоянда аз Ҳукумати Ҷумҳурии Тоҷикистон, сардори Раёсати кишоварзӣ ва ҳифзи муҳити зисти Дастгоҳи иҷроияи Президенти Чумҳурии Тоҷикистон Сабурзода Мирзодавлат иштирок намуд.  

Ҳамзамон, хабарнигорон аз шабакаҳои телевизиону радио, нашрияҳои сомонавию чопӣ ва овозии давлативу мустақил иштирок карданд.

Дар оғози нишаст аз ҷониби муовини якуми раиси Кумита Қиёмзода Зарафо Суфиҷон оид ба самтҳои муҳимтарини фаъолияти соҳавӣ, аз ҷумла рафти иҷрои нақшаҳои амал, барномаҳои давлатию соҳавӣ, пешбурди назорати давлатӣ, баланд бардоштани сатҳи маърифати экологии аҳолӣ, амалигардонии чорабиниҳои дигари соҳавӣ  ба таври фишурда маълумот дода шуд.

Сипас, дар бахши саволу ҷавоб хабарнигорон бештар ба масъалаҳои ҳифзи муҳити зист, аз ҷумла ҳамкориҳои байналмилалӣ, масъалаҳои тағйирёбии иқлим, ҳифзи пиряхҳо ва манбаъҳои обӣ, обуҳавошиносӣ, ҳолати партовгоҳҳо, ҳифзи ҳавои атмосфера, ҷамъоварӣ  ва безараргардонии фурӯзонакҳои симобдори аз истифода баромада, вазъи экологии баъзе шаҳру ноҳияҳои ҷумҳурӣ ва ғайра таваҷҷуҳ зоҳир намуда, саволҳо пешниҳод намуданд.

Дар Нишасти матбуотӣ муовини якуми раиси Кумита Қиёмзода З. С., масъулони сохторҳои дахлдори соҳавии Кумита иштирок намуда,  ба саволҳои сершумори  хабарнигорон посухҳои мушаххас доданд.